DILI, 12 setembru 2019 (TATOLI) – Profesór sira ho grau akadémiku lisensiatura no baxarelatu hamutuk na’in 28, semana ne’e sei asina kontratu ho Ministériu Edukasaun Juventude no Desportu (MEJD) hodi destaka ba munisípiu 12 para reforsa Programa Ekivalénsia nivel I no II.
Nivel I primária nian kada atividade sei koloka profesór na’in 1 no nivel II terseiru siklu kada atividade profesór na’in tolu.
Diretór Jerál Pré-Eskolár no Ensinu Báziku, Cidalio Leite informa katak planu ne’e loloos presiza profesór hamutuk 33 maibé depois kuandu kandidatu sira ne’e tama ona iha faze entrevista na’in lima la prienxe kritériu.
“Loloos nee ita presiza profesór nivel I primária nian hamutuk 21 maibé 18 pesoas de’it mak liu nune’e mós terseiru siklu nivel II nian ita presiza 12 maibé 10 de’it mak liu. Sira nia naran ita hatama ona hodi hein prosesu kontratu,” informa Diretór Cidalio Leite ba Ajénsia TATOLI iha nia gabinete MEJD, Vila Verde, kinta (12/09/2019).
Diretór Cidalio Leite nu’udar mós prezidente ba programa ne’e hateten tan katak tanba nesesidade terseiru siklu nivel II ne’e kada grupu tenke profesór na’in tolu atu kompleta malu. Se na’in ida mak la iha entaun programa ne’e la bele hala’o tanba Nivel II tama ona ho matéria Portugés no tetun.
“Entaun kuandu ami hatama relatóriu rezultadu entrevista ba DNRH (Dirasaun Nasionál Rekursu Humanu) ho totál profesór 28 pesoas ne’e, ha’u mós uza kompeténsia nu’udar DJ inklui Prezidente rekomenda tan profesór na’in 2 hodi kompleta nivel II nian hodi destaka ba Ilomar no Bobonaro,”dehan diretór ne’e.
“Tanba selae programa ensinu ekivalénsia iha Ilomar no Bobonaro labele realiza. Maske resposta seidauk iha maibé esperansa iha nafatin atu programa ne’e bele la’o ba oin,” reforsa tan diretór ne’e.
Entretantu, vagas 33 ne’ebé fó sai husi DNRH kuaze kandidatu na’in 400 mak konkorre maibé depois selesaun dokumentu na’in 200 mak selesiona.
Tuir mai, teste eskrita na’in 100 resin de’it mak partisipa no depois DNRH halo fali selesaun ba rezultadu eskrita kuaze na’in 76 de’it mak hetan valór di’ak. Entaun, husi prosesu eliminasaun iha faze entrevista na’in 28 de’it mak selesionadu.
Notísia relevante:Estudante Ensinu Rekorrente Na’in 195 Mak Sei Tuir Ezame Nasionál
Jornalista : Tomé Amado
Editór : Rafy Belo
