DILI, 13 setembru 2019 (TATOLI)—Árbitru internasionál hosi Association Football Confederation (AFC), Nafeez, hateten sira sei dirije jogu Liga Futeból Amadora ( LFA) ho di’ak nune’e bele halo liga Timor-Leste buras ba oin.
“Liga Timor-Leste nian di’ak tebes. Ami sei hatudu prestasaun hú ho di’ak. Desizaun ne’ebé ami foti bazeia ba saida mak jogadór sira hala’o iha kampu laran. Ami sei dirije jogu sira ho di’ak,” tenik Nafeez ba Agência Tatoli iha Hotel Dili City, Bebora, sesta ne’e.
Lee mós: Jogu Jornada 12-14 Sei Dirije Hosi Árbitru Internasionál
Haree ba LFA hanesan liga Timor-Leste nian ne’ebé foin hamriik, nia husu parte hotu atu kolabora malu hodi lori liga ne’e bele sai di’ak hanesan liga sira ne’ebé dadaun ne’e la’o hela iha Ázia.
Árbitru rua ne’ebé oras ne’e marka ona prezensa iha Timor mak hanesan Khairulsyahmi no Nafeez, iha ne’ebé sira sei hamutuk ho árbitru timoroan balun hodi lidera jogu LFA ne’ebé sei hala’o iha Maliana no Dili.
Árbitru rua ho nasionalidade Malázia ne’e sei hela iha Timor-Leste to’o liga Primeira Divizaun époka 2019 ramata.
Jornalista: Hortençio Sanchez
Editór: Xisto Freitas
