DILI, 13 setembru 2019 (TATOLI) – Vise Prezidente Parlamentu Repúblika Indonézia, Fadli Zon, akompaña husi Embaixadór Indonézia iha Timor-Leste, Sahat Sitorus hala’o vizita kortezia ho Prezidente Parlamentu Nasionál (PPN), Arão Noé de Jesus da Costa Amaral, hodi hamentin kooperasaun entre parlamentu nasaun rua ne’e, nune’e bele apoia malu iha kualkér fórum internasionál.
“Vizita ne’e ho objetivu atu bele hametin relasaun entre povu no nasaun rua, espesiál parlamentu rai rua nian. iha enkontru ne’e asuntu barak mak ami koloka, primeiru atu bele iha relasaun di’ak entre nasaun-rua, tanba nasaun viziñu ita presiza relasaun di’ak, hafoin agradese ba relasaun ne’ebé iha”, tenik PPN ba jornalista sira iha Parlamentu Nasionál (PN), sesta ne’e.
Arão Noé rekoñese, maski ho problema naruk iha tinan 24 nia laran, maibé Timor-Leste ho Indonézia bele ultrapasa no agora relasaun di’ak tebes, tanba ne’e nia konsidera ida ne’e sinál pozitivu.
Nia dehan, ho esperiénsia ne’ebé Timor-Leste ho Indonézia hatudu ona, nasaun barak iha mundu hakarak aprende ho situsasaun ne’ebé rai rua ultrapasa ona.
Iha fatin hanesan Vise Prezidente Parlamentu Indonézia, Fadlin Zon, hateten vizita ne’e atu hametin kooperasaun entre parlamentu rai-rua nian.
“Haforsa kooperasaun entre Parlamentu Indonézia no Parlamentu Timor-Leste hanesan tempu ne’ebé importante, tanba hafoin tinan 20 referendum ita haree katak durante ne’e servisu hamutuk barak tebes iha setór oinoin, hanesan setór ekonomia, komérsiu no polítika. Nune’e mós iha fórum internasionál sira, Parlamentu Indonézia sempre servisu hamutuk ho Parlamentu Timor-Leste hodi fó apoia malu hodi sai membru ASEAN”, dehan Fadli Zon.
Jornalista: Evaristo Soares Martins
Editór: Xisto Freitas
