DILI, 16 setembru 2019 (TATOLI)—Ministra Edukasaun Juventude no Desportu (MEJD), Dulce de Jesus Soares, hateten estudante na’in lima ne’ebé sei tuir kompetisaun siénsia no Matemátika iha Malázia ne’e konsidera nu’udar sientista jerasaun foun.
Estudante na’in lima ne’e hetan oportunidade ho abilidade ne’ebé iha sei reprezenta estudante hotu iha territóriu Timor-Leste inklui estadu TL nia naran sei dezloka ba Malázia hahú iha loron 17 setembru 2019 hodi kompete ho partisipante sira mai husi eskola 120 iha mundu.
Partisipasaun estudante na’in lima iha kompetisaun refere tanba TL sai tiha ona membru ativu ba Southeast Asian Ministers of Education Organization (SEAMEO) no TL sai membru ne’ebé ativu tebes iha Sentru Matemátika ba Língua iha SEAMEO ne’e rasik.
“Ita tenke orgullu hanesan sidadaun Timor tanba ita-nia oan sira no mós ita-nia estudante sira hatudu ona sira-nia matenek la’ós de’it iha Timor maibé iha nasaun sira seluk inklui eskola 120 ita iha mundu,” dehan Ministra Edukasaun Juventude no Desportu (MEJD), Dulce de Jesus Soares, ba jornalista sira iha Salaun Enkontru Ministériu Edukasaun, Vila Verde, Dili, segunda (16/09/2019).
Nia hatutan, kompetisaun ne’e ba daruak ona no eventu ne’e hetan partisipasaun husi nasaun 11 inklui 280 eskola iha mundu. Husi rezultadu ne’e, TL liu husi estudante na’in lima ne’e konsege hetan fatin iha númeru 30 hodi hakat ba semi-finál.
“Agora ita-nia estudante na’in lima ne’e sei dezloka ba Malázia hodi kompete fali ho eskola 120 ne’ebé tama iha semi-finál ne’e,” nia informa.
Prestasaun ne’ebé mak estudante na’in lima ne’e hatudu ona nu’udar motivasaun di’ak ida ba estudante sira seluk iha TL atu banati tuir ezemplu di’ak sira ne’e.
Nu’udar reprezentante governu, Dulce hatutan kuandu sira na’in lima mak konsege hamenus tan númeru 30 ne’e, orgullu boot liu tan ba TL. Maibé la konsege mós ida ne’e Governu konsidera prestasaun ida tenke valoriza TANBA sira kontribui ona ba progresu edukasaun iha TL.
Entretantu, nia informa, estudante na’in lima ne’ebé tuir kompetisaun ne’e mak hanesan Lucrecia Araújo dos Reis husi Eskola Sekundária Jerál (ESG), São Pedro Comoro, Celina Maria Vandashiva Alves Tilman husi ESG Canossa Dili, Veronica Dias Monteiro no Marlina Marques Cabral husi ESG 4 de Setembru UNAMET, no Alberto Salomão dos Santos husi Escola de Hospitalidade e Turismo Becora Dili.
Jornalista: Tomé Amado
Esitór : Rafy Belo
