DILI, 16 setembru 2019 (TATOLI) – Sekretáriu Estadu Komunikasaun Sosiál (SEKOMS) nia totál proposta orsamentu ba 2020 hamutuk millaun $13,3 ne’ebé mak husi montante ne’e millaun $4,3 ba SEKOMS no millaun $9 nu’udar kompromisu foun atu harii edifísiu Rádiu Televizaun Timor-Leste ka RTTL, E.P no Ajénsia Notisioza Timor-Leste TATOLI, I.P.
“Millaun $9 ba infraestrutura RTTL, E.P ho torre 12 inklui edifísiu TATOLI. Millaun $4.3 ba bens servisu, saláriu vensimentu no transferénsia públika”, SEKOMS, Merício Juvinal dos Reis “Akara”, ba jornalista sira hafoin revizaun pakote orsamentu 2020 iha edifísiu Ministériu Finansa, Aitarak-Laran, ohin.
Nia esplika katak orsamentu transferénsia públika sei distribui fali ba órgaun tutela sira maka millaun $1 ba RTTL.E.P, rihun $531.104 ba TATOLI, no rihun $250 kontinua apoia rádiu komunidade hamutuk 16 iha Timór laran tomak.
Ba bens no servisu sei kontinua apoia atividade ne’ebé maka Diresaun Nasionál Diseminasaun Informasaun (DNDI) halo, apoia mós ba Sentru Formasaun Teknolojia no Komunikasaun (CEFTEC, sigla portugés) kona-ba atividade formasaun ba jornalista sira inklui propoin orsamentu adisionál rihun $250 ba Konsultóriu Língua Portugeza.
Nia lembra fali katak durante ne’e Instituto Camões maka finansia, maibé tinan oin Governu hakarak tau osan atu haree hamutuk hodi kontinua, tanba foin lais kuaze jornalista barak maka hetan rezultadu di’ak ka jornalista hamutuk 60-resin maka hetan sertifikadu.
Nune’e, SEKOMS hanoin katak orsamentu ba Konsultóriu Lian Portugés importante atu prevee. Tanba ne’e Governu liuhosi SEKOMS iha polítika atu tau osan.
“Tinan oin, SEKOMS prevee mill $250 atu apoia Konsultóriu Dalen Portugés nian”, adianta.
Jornalista : Zezito Silva
Editora : Maria Auxiliadora
