DILI, 17 setembru 2019 (TATOLI)-Liu husi diskusaun ho Komité Revizaun Orsamentu Polítika (KROP), ohin, Autoridade Munisípiu Bobonaro husu tan proposta adisionál millaun $4 iha polítika Orsamentu Jerál Estadu (OJE) 2020, hodi implementa ba Planu Dezenvolvimentu Integradu Munisipál (PDIM).
Notísia Relevante : 2020, Bobonaro Prioritiza Infraestrutura Estrada
Proposta adisionál ba orsamentu ne’e atu aloka ba nesesidade povu nian iha área bee moos, estrada rurál, postu saúde, eskola no seluk tan ho montante osan menus husi rihun atus lima.
“Projetu integradu ne’e mai husi suku nia nesesidade presiza ho projetu ki’ik ne’ebé entrega ba Munisípiu hanesan bee moos, estrada, eskola, postu saúde no seluk tan hodi implementa,” informa Prezidente Autoridade Munisípiu Bobonaro, Zeferino dos Santos, ba Jornalista sira, iha edifísiu Ministériu Finansa, Dili.
Notísia Relevante : Komunidade Suku Sia iha Bobonaro Seidauk Asesu Eletrisidade
Husi proposta adisionál ne’e, tuir planu, sei ezekuta mós ba projetu reabilitasaun estrada ne’ebé liga husi Munisípiu ho Postu Administrativu Lolotoe tanba durante ne’e, difikulta tebes movimentasaun públiku.
“Ho orsamentu adisionál hodi konsentra ba planu kapitál dezenvolvimentu Munisipál nian atu kria kondisaun mínimu no responde nesesidade komunidade nian hanesan infraestrutura sai difikuldade hela, ba saneamentu bee moos,” Zeferino tenik.
Kona-ba asesu bee moos, Prezidente Autoridade Munisípiu ne’e relata, Munisípiu Bobonaro iha Aldeia 192 maibé porsentu 70 asesu ona bee moos.
Iha tinan 2020, Munisípiu Bobonaro hetan tetu fiskál hamutuk millaun $4-resin hodi ezekuta ba saláriu vensimentu, bens servisu no transferénsia públika.
Tuir Zeferino dos Santos, ezekusaun orsamentu husi transferénsia públika iha tinan oin sei ezekuta mós ba planu no prioridade suku nian. Nune’e mós bens serbisu ninia sei aloka ba programa merenda eskolár.
Munisípiu Bobonaro ezekuta ona OJE 2019 porsentu 67 husi total millaun $3-resin ne’ebé ezekuta ba saláriu vensimentu, bens servisu no transferénsia públika.
Jornalista : Nelson de Sousa
Editór : Francisco Simões
