DILI, 17 setembru 2019 (TATOLI) – Governu liuhosi Ministériu Turizmu, Komérsiu no Indústria (MTKI) ho Komité 12 Novembru (K12N) hetan ona solusaun atu altera naran jardín “12 de Novembro Motael,” ba jardín “Sebastião Gomes”.
Mudansa ba naran ne’e hafoin MTKI hetan kritika husi K12N no sujere atu muda naran ne’ebé antes ne’e husi MTKI tau 12 Novembru ba fali jardín Sebastião Gomes.
“Ami hetan ona solusaun liuhusi diskusaun no Governu rona preokupasaun Komité 12 Novembru atu altera naran 12 de Novembro Motael ba Jardín Sebastião Gomes,” Ministru Turizmu, Komérsiu no Indústria interinu, Fidelis Leite Magalhães, informa hafoin enkontru ho Prezidente K12N, Gregorio Saldanha iha edifísiu Ministériu Finansa, Aitarak-Laran, ohin.
Ministru Fidelis orienta ona ekipa diresaun MTKI atu koordena ho kompañia hodi troka naran. “Ha’u orienta ona atu tempu barak muda naran ne’ebé kompañia konstrui ona hodi tau fali naran jardín “Sebastião Gomes Motael”, kona-ba osan ami sei diskute ho kompañia”.
Sobre preokupasaun estátua 12 Novembru, ministru ne’e dehan: “Ita rona mós preokupasaun ne’e husi Komité 12 Novembru, maibé ita trata faze pur faze”, afirma.
Iha fatin hanesan, Prezidente Komité 12 Novembru, Gregorio Saldanha, agradese tanba Governu ho fuan boot rona preokupasaun komité nian hodi muda naran jardín nian.
“Ha’u agradese Governu tanba muda naran jardín 12 de Novembro hodi tau naran ne’ebé merese mak jardín Sebastião Gomes ne’e atu hatuur istória ho loos no iha fatin atu jerasaun foun bele hatene no aprende”, Gregorio agradese.
Prezidente ne’e sente kontente tanba Governu apoia hodi hatuur patrimóniu Estadu hanesan 12 Novembru no Sebastião Gomes iha nia fatin hodi jerasaun foun bele hatene istória ho loos.
”12 de Novembro ne’e ami kontente liután kuandu tau iha nia fatin hanesan iha fatin akontesimentu iha Santa Krús”, katak.
Jardín Motaél ne’e konstrui husi empreza ALGIS Engineering Construction, Lda, ho totál orsamentu 95.000 no durasaun konstrusaun fulan tolu.
Notísia relevante : MTKI Hanaran Jardín “12 de Novembro Motael” Tanba Haree ba Estátua
Jornalista : Florencio Miranda Ximenes
Editora : Maria Auxiliadora
