MANUFAHI, 19 setembru 2019 (TATOLI)-Estudante 180-resin, oras ne’e, hala’o hela estudu lisensiatura (S1) iha Universidade Boaventura Timor-Leste (UBTL) Munisípiu Manufahi.
Universidade ne’e harii iha tinan 2017 ho motto “Haburas Siénsia Dezenvolvimentu Nasaun” ho nia fakuldade haat, mak hanesan fakuldade agrikultura ho ninia departamentu agronomia, fakuldade tékniku ho departamentu konstrusaun sivíl no Informasaun komputadór ho teknolojia (ICT-sigla Inglés), fakuldade ekonomia departamentu jestaun no saúde ho departamentu enfermajen no saúde públiku.
Reitór Universidade Boaventura Timor-Leste (UBTL), Luis da Silva, hatete, edukasaun pilár importante hodi apoiu dezenvolvimentu tanba ne’e, UBTL eziste iha Manufahi atu prepara rekursu umanu kualifikadu hodi orienta ba merkadu serbisu.
Nia dehan, mezmu universidade ne’e foun, maibé, iha rekursu umanu sufisiente liuliu dosente sira atu hanorin tanba daudaun ne’e iha Dosente hamutuk 40 balun ho nivel edukasaun mestradu (S2), doutoramentu (S3) no lisensiatura (S1).
Universidade Boaventura durante ne’e, hetan mós apoiu rekursu umanu husi Ajénsia kooperasaun Singapura, Japaun no Austrália hodi dezenvolve universidade ne’e.
“Universidade iha rekursu sufisiente no ha’u garante katak sei forma Timoroan sira ho kualidade,” hateten Reitór UBTL, Luis da Costa, ba Ajénsia TATOLI, iha Same Vila, Kuarta (18/09/2019).
Kona-ba prosesu akreditasaun husi Governu ba Universidade Privada ne’e, Reitór ne’e dehan, daudaun ne’e ekipa husi Ministériu Edukasaun Juventude no Desportu (MEJD) halo ona avaliasaun ba kondisaun universidade nian iha fulan hirak kotuk maibé seidauk fó sai rezultadu.
Jornalista : Nelson de Sousa
Editór : Francisco Simões
