DILI, 19 setembru 2019 (TATOLI) – Tribunal Distritál Dili (TDD), segunda (23/09/2019), sei hasai desizaun finál (leitura akórdaun) ba Koordenadór Jerál CPD-RDTL, António Ai-Tahan Matak ho nia “kamarada” sira seluk.
Notísia Relevante : Membru CPD – RDTL “Okupa” Resintu Tribunal
António Ai-Tahan Matak ho nia “kamarada” sira, inklui arguida Angela Freitas, hetan akuzasaun husi Ministériu Públiku tanba deskonfia komete krime alterasaun Estado de Dereito no krime asosiasaun kriminoza ho krime abuzu sinais ka uniforme.
António Ai-Tahan Matak ho nia membru no “kamarada” sira hatán akuzasaun tanba halo movimentu semi militár iha envolvimentu grupu “armadu” ilegál ho naran Konsellu Revolusaun Maubere (KRM) ne’ebé komanda husi Komandante Brigada Vermella, matebian Paulino Gama “Mauk Moruk”.
Tuir akuzasaun Ministériu Públiku nian katak, fulan Fevereiru tinan 2014, grupu CPD-RDTL ne’ebé nia baze iha Munisípiu Baucau hatais farda militár ho bandeira hodi halo treinu no formatura hanesan forsa defensiva ida.
Arguida Angela Freitas halo parte mós iha atividade hotu-hotu husi grupu Konsellu Revolusaun Maubere (KRM) nu’udar konselleira másima iha konsellu ne’ebé komanda husi Matebian Mauk Moruk.
Iha fulan Fevereiru no inísiu fulan Marsu tinan 2014, iha Dili no Baucau matebian Mauk Moruk, arguido sira Komandante Labarik no Antonio Ai-Tahan Matak mosu fardadu hodi koordena elementu sira seluk, husi grupu hanaran an CRPM no CPD – RDTL.
Audiénsia julgamentu nee prezide husi Juis José Maria de Araujo no arguida Angela Freitas hetan asisténsia legal husi advogadu privadu, no arguido sira seluk hetan asisténsia legal husi defensór públiku.
Jornalista : Domingos da Piedade Freitas
Editór : Francisco Simões
