BAUCAU, 23 setembru 2019 (TATOLI)—Kompañia Acelda prodús mina-nuu orijinál ne’ebé ninia durasaun atu uza to’o tinan hitu tanba mina-nuu ne’e la kahur ho bee maibé mina orijinál.
Produsaun mina-nuu ne’e hanesan projetu pilotu ida ne’ebé Kompañia Acelda halo ne’ebé daudaun ne’e konsumidór ne’ebé konsumu hela besik iha área refere. Produsaun mina-nuu ne’e prodús iha Aldeia Darasula, Suku Gariuai, Postu Administrativu Baucau Vila, Munisípiu Baucau
“Mina-nuu ne’e komunidade balun konsumu ona ho di’ak. Maibé seidauk fa’an iha merkadória tanba mina teen sei iha no mina seu la dun moos. Maibé, agora buka meius oinsá para ta’is halo moos hodi ba fa’an iha merkadória nasionál no mós internasionál,” dehan Diretór Kompañia Acelda, Higino da Costa Freitas, ba Ajénsia TATOLI liuhusi entrevista iha nia rezidénsia, Darasula, Gariuai, Baucau, segunda (23/9/2019).
Atu prosesa no prodús mina-nuu ne’e sai moos nabilan, nia hatutan, Kompañia Acelda iha planu atu halo ligasaun ho Kompañia Xineza balun tanba Xineza sira ne’e ema ekonomia iha mundu tanba sira hatene hotu halo buat hotu. Iha tempu badak, Kompañia Xineza balun sei mai vizita fatin prosesu prodús mina iha Kompañia Acelda.
Diretor Acelda infroma, to’o oras ne’e mina-nuu seidauk esporta ba rai li’ur tanba sei iha faze projetu pilotu. Iha rai laran mós, nia dehan, seidauk hatama ba merkadu tanba mina-teen sei iha entaun ita sei buka ta’is didi’ak mak hatama ba merkadu para ba oin atrai ema hodi bele sosa.
Prosesu atu prodús mina-nuu, nia hateten, nuu fuan sanulu resin rua (12) bele prodús sai ba mina litru ida. Iha loron ida, kompañia bele prodús de’it mina-nuu kilo atus ida resin diferente ho mina-kamii.
Notísia relevante:Kompañia Acelda Loron Ida Prodús Mina-Kamii 200 kg
Jornalista: Felicidade Ximenes
Editór : Rafy Belo
