DILI, 23 setembru 2019 (TATOLI) – Xefe Departamentu Rejistu Veíkulu Diresaun Nasionál Transporte no Terrestre (DNTT) Ministériu Transporte no Komunikasaun, Nelson Martins, hatete motoriza no karreta ne’ebé seidauk hetan xapa matríkula orijinál hamutuk rihun 20-resin.
“Tuir ami nia dadus motorizada no karreta ne’ebé mak seidauk hetan xapa matríkula orijinál k kuaze rihun ruanulu-resin”, dehan nia ba Tatoli iha Balidi, ohin.
Nelson afirma problema ida ne’e sai preokupasaun no obstákulu ne’ebé maka durante ne’e DNTT enfrenta, tanba kliente sira ne’ebé maka mai trata xapa matríkula sempre la satisfás ba kestaun ne’e.
“Ba servisu atendimentu rejistu veíkulu nian la’o di’ak, maibé difikuldade maka hanesan material ne’ebé kliente sira preokupa maka xapa matríkula. Tanba kliente sira mai rejista kontribui ba reseita ba Estadu, maibé xapa matríkula orijinál maka laiha no ami fó de’it suratahan”, dehan Nelson.
Ba kestaun ne’e rezolve ona, tanba foin daudaun ministériu halo ona konkursu ba kompañia ne’ebé maka manán atu prodús xapa matríkula orijinál mak Kaikobilari Unipessoal, Lda.
“Ami simu ona informasaun katak kompañia hahú halo ona produsaun no semana ida ka rua tan sira bele hatama mai ona no ita bele uza ona xapa matríkula orijinál”, hatete Xefe Departamentu ne’e.
Atu labele atraza tan ba kestaun sira ne’e Xefe Departamentu husu ba ministériu atu toma atensaun no fó prioritizasaun ba xapa matríkula no kestaun seluk ne’ebé maka relasiona ba atendimentu públiku. Tanba atendimentu públiku ne’e importante tebes ba iha instituisaun Estadu hanesan DNTT.
“Se bele tinan-tinan ministru tenke tau atensaun no fó prioridade ba iha kestaun xapa matríkula oinsá tau osan boot ba ida ne’e para ita bele rezolve, se lae DNTT hetan difikuldade”, tenik Nelson.
Notísia relevante : Kompañia Hahú Prodús Xapa Matríkula Orijinál Rihun 22
Jornalista : Natalino Costa
Editora : Maria Auxiliadora
