AINARU, 25 setembru 2019 (TATOLI) – Prezidente Autoridade Munisípiu Ainaru, Albertino de Araújo, hatete lei justisa tradisionál no kostumeiru sei hetan kbiit atu fó justisa ba povu ki’ik ho lais no dignu bainhira Governu legaliza nu’udar lei hodi implementa.
Notísia Relevante:Autoridade Lokál Aileu Konsidera Lei Justisa Tradisionál fó Kbiit ba Sira
Nia dehan munisípiu Ainaru iha kostume oi-oin, maibé durante ne’e seidauk implementa ho di’ak, tanba seidauk legaliza nu’udar lei hodi fó justisa ba kazu sivíl sira hanesan disputa rai, kazu fetosa-umane, lia mate no lia moris, no tara bandu.
“Durante la’o seidauk organizadu ho didiak, tanba ne’e liuhosi programa governu nian ne’e bele organiza regra tradisionál kada suku hodi lori ita nia povu ba asesu justisa ida ho di’ak liután”, dehan Albertino de Araújo hafoin partisipa programa konsultasaun públika kona-ba lei justisa tradisionál no kostumeiru ne’ebé halo husi Ministériu Reforma Lejizlativa no Asuntu Parlamentár (MRLAP), kuarta (25/9) iha Ainaru.
Notísia Relevante:Lei Kostumeiru ho Justisa Tradisionál Ajuda Serbisu Judisiál
Iha biban hanesan, Xefe suku Ainaro Vila, Agapito Fatima Martins, munisípiu Ainaru iha uma lisan 60 maiória husi étniku Mambae no minoria bunak, maibé ida-idak iha ninia kostume ne’ebé forte hodi regula ninia abitante.
Nia konta tara bandu ida bai-bain komunidade tenke kumpre maka seremonia koremetan, antes atu hala’o tenke hetan aseitasaun husi Konsellu suku.
Notísia Relevante:Autoridade Lolotoe Konsidera Lei Kostumeiru Bele Dezenvolve Setór Justisa
“Programa koremetan, família ida tenke aprezenta ba Konsellu Suku, tenke prienxe rekezitu, liuliu haree família ne’e iha kbiit finanseiru bele realiza, maibé la prenxe kritéria la autoriza”, Xefe Suku ne’e tenik.
Entretantu, Kordenadora Gabinete MRLAP, Melisa Silva Caldas, hatete ho informasaun ne’ebé rekolla ona sei tulun governu hodi prepara lei justisa tradisionál no kostumeiru hodi implementa.
Jornalista: Nelson de Sousa
Editora: Rita Almeida
