DILI, 25 setembru 2019 (TATOLI) – Koordenadór Jerál Antonio Ai-tahan Matak ho nia kamarada sira agradese ba Tribunal absolve sira husi krime ko autoria material, ho forma konsumada no ho konkursu real, komete krime alterasaun Estadu de Direitu, artigu 202 númeru 2 no krime asosiasaun kriminoza husi artigu 188 númeru 1 no 2, krime abuzu uniforme 1 husi artigu 194 hot-hotu husi KPTL no krime borla I husi artigu 267 KPTL.
Notísia Relevante : Eis Membru CPD – RDTL Okupa Resintu Tribunál
Arguidu sira mak hanesan Antonio Tómas do Amaral da Costa ho Antonio Aitahan Matak, Maria Ángela Freitas, Amaro da Conceicao Soares, Manuel Guterres Correia, Jose/Sergio dos Santos Lemos,, Rofino do Carmo, Moises do Carmo, Ángelo da Silva Vicente, Joaquim Fernandes da Silva, Ivo de Jessus Sequeria, Paulo Parada, Manuel Gusmao, Marcelino da Conceicao, Gil Fernandes da Costa José Teki Liras, Joao da Silva Soares, Simao de Aroujo, António Casimiro, Paulo Soares, Adriana Atok ho Lourenco Barreto ho ko autoria material, ho forma konsumada no ho konkursu real, komete krime alterasaun Estadu de Direitu, artigu 202 númeru 2 no krime asosiasaun kriminoza husi artigu 188 númeru 1 no 2, krime abuzu sinain ka uniforme 1 husi artigu 194 hot-hotu husi KPTL.
Arguido sira Adriana Lourenco Barreto hamutuk halo krime burla I husi artigu 267 KPTL.
“Ha’u hakarak agradese tebes tanba tribunal, Ministériu Públiku no defeza hatene tetu no fó justisa justu,” hateten Antonio Ai-tahan Matak, hodi responde Ajénsia Tatoli, ohin, liu husi komunikasaun telemovel.
Iha Segunda (23/09/2019) liu husi desizaun final, Tibunal absolve arguido sira hamutuk nain 21 ba kazu CPD-RDTL, envolve Mauk Moruk ho nia ekipa, tanba la hetan provas sufisiente husi Ministériu Públiku.
Antonio Ai-tahan Matak ho nia kamarada sira antes hatene momoos no loloos katak sira la sala buat ida, husi sira nia kontribuisaun veteranu ohin loron Timor-Leste hetan liberdade, entaun laiha hanoin aat ida ba nasaun, paraleinde atu buka de’it pás no estabilidade iha nasaun ida ne’e.
Iha biban seluk, Manuel Tilman hanesan defeza, agradese mós ba tribunal tanba fó justisa justu no husu atu estadu fó fila fali sasán sira ne’ebé mak estadu sita inklui edifísiu CPD rua, tanba depois remata prosesu grupu organizasaun ne’e sei ativa fila fali.
Tilman hatete, tribunal rekoñese ona grupu ne’e maske arguido sira harii la rezista, maibé sira fó tulun sustentabilidade alimentár, no la’ós atu harii grupu kriminozu.
Audiénsia julgamentu ne’e, prezide husi juis Jose Maria de Araújo, Srybuana da Costa no Francisca Cabral, parte Ministériu Públiku reprezenta husi Prokuradór Rogerio Viegas, no arguido sira hetan asisténsia legal husi advogadu privadu, Manuel Tilman no akompaña mós hosi defensór públiku João Carvalho.
Jornalista : Domingos da Piedade Freitas
Editór : Francisco Simões
