DILI, 26 setembru 2019 (TATOLI) – Ministériu Solidaridade Sosiál no Inkluzaun (MSSI) ho Sekretária Estadu Formasaun Profisionál no Empregu (SEFOPE), ohin kontinua halo konsultasaun ho parseiru dezenvolvimentu sira kona-ba planu asaun nasionál ba ema ho defisiénsia 2020-2024 iha salaun SEFOPE Kaikoli.
Notísia Relevante: MSSI ho MS Halo Konsultasaun Nível Ministeriál Ezbosu PAN Ba Ema Ho Defisiénsia
Vise Ministra Solidaridade Sosiál no Inkluzaun, Signi Chandrawati Verdial, hatete planu asaun nasionál ba ema ho defisiénsia ne’e importante fó protesaun no asisténsia ba ema ho kondisaun defisiénsia, tanba ne’e persiza kontribuisaun hanoin husi parseiru dezenvolvimentu ho liña ministérial sira atu integra iha orsamentu 2020.
“Planu asaun ba ema ho defisiénsia la’ós kompeténsia MSSI nian de’it maibé ministériu relevante”, dehan Signi ba Tatoli.
Sekretáriu Estadu Formasaun Profesionál no Empregu (SEFOPE), Julião da Silva, relata prevee ona orsamentu iha tinan oin hodi fasilita formasaun profesionál ba ema ho defisiénsia.
Durante konsultasaun públiku, MSSI no SEFOPE mós diskute atu kontinua sosializa ba liña ministeriál hotu.
Programa konsultasaun ne’e partisipa husi funsionáriu SEFOPE, reprezentante Ministériu Turizmu Komérsiu no Indústria (MTCI) reprezentante Sekretáriu Estadu Juventude no Desportu (SEJD), reprezentante Embaixadór Austrália iha Timor-Leste, reprezenta Austrália Aid, Raes Hadomi Timoroan (RHTO), Asosiasaun Halibur Defisiénsia Matan Timor-Leste (AHDMTL), Asosiasaun Defisiénsia Timor-Leste (ADTL), Misaun Lepra Timor-Leste no Parseiru Dezenvolvimentu Umanu (PHD-sigla Inglés)
Jornalista: Osório Marques
Editora: Rita Almeida
