DILI, 25 setembru 2019 ( TATOLI)-Suspeitu nain rua ne’ebé envolve iha kazu Aimutin, ohin, submete ona ba Primeiru Interrogatóriu no na’in rua seluk sei iha prizaun preventiva hodi kumpre 72 horas.
Notísai Relevante : Polísia Detein Ona Suspeitu Na’in Rua Ba Kazu Konfrontu Ai-mutin
Defeza Fernando da Costa ba suspeitu ho inisiál ANM no JS, informa ba jornalista sira iha TDD, katak iha primeiru interrogatóriu nia parte konsidera kazu rua mak hanesan omisídiu agravadu no obstrusaun publika.
“Ha’u hanoin akontesimentu ne’ebé mak akontese iha area Aimutin, Suku Comoro, Postu Dom Aleixo, Munisípiu Dili, konsidera ninia kliente nain komete krime obstrusaun publika ne’ebé mak previstu iha artigu 243,” esplika Fernando da Costa.
Nia dehan, momentu ne’ebá grupu arte ritual Colimau 2002 fila husi Taibessi mak iha Aimutin mosu konfrontasaun mak ninia kliente nain rua iha karreta laran hakilar “Viva Colimau 2000” mak autoridade polisia rona sala katak tolok sira mak polisia sira detein sira.
“Seidauk iha desizaun no adia fali ba aban iha tuku 11 : 30 OTL tamba juis kaer prosesu presiza estuda, antes foti desizaun. Maske nune’e, nu’udar defeza garante katak Tribunal bele absolve sira husi krime obstrusaun nee,” tenik Fernando da Costa.
Iha audiénsia julgamentu nee prezide husi Juis Ivan Patrocinio, Ministériu Públiku reprezenta husi prokuradór Matias Soares no suspeitu sira hetan asisténsia legal husi advogadu privadu, Agostinho de Jesus ho Fernando da Costa.
Jornalista : Domingos Piedade Freitas
Editór : Francisco Simões
