DILI, 26 setembru 2019 (TATOLI) – Tribunál Distritál Dili, ohin liuhosi primeiru interogatóriu aplika medida koasaun, aprezentasaun periodika ba suspeitu AMM no JS ba kazu Ai-mutin ho krime obstrusaun autoridade públika.
Defeza husi suspeitu nain rua, Fernando da Costa, hatete medida koasaun ne’e tanba laiha indísiu forte hodi aplika prizaun preventiva.
“Ohin, desizaun tribunál aplika medida koasaun, aprezentasaun periodika hodi hein prosesu investigasaun”, dehan defeza ba jornalista sira iha tribunál.
Nia dehan razaun seluk mak alegasaun ministériu públiku nian solisita ba tribunál atu aplika medida koasaun aprezentasaun periodika.
Ministeriu públiku akuza arguidu sira ho krime obstrusaun autoridade públika ne’ebé previstu iha artigu 243 husi kodigu penál. Alínea 1) Sé mak liuhosi violénsia ka ameasa maka’as kontra funsionáriu ka ema husi forsa militár nian, militarizadu ka polisiál sira, bainhira opoin ba prátika asaun ka’it ho ezersísiu ninia funsaun sira ka bandu ba prátika asaun kontráriu ba ninia devér sira sei kondena ho pena prizaun husi tinan 2 to’o 6.
Alínea 2) – Bainhira asaun ne’ebé temi tiha iha númeru anteriór pratika efetivu ka bandu atu prátika maka sei kastigu ho pena tinan 2 to’o 8.
Audénsia ne’e preside husi juis singulár Ivan Suritay, ministériu públiku reprezenta husi prokuradór Matias Soares, arguidu hetan asistensia legál hui advogadu privadu, Fernando da Costa no Agostinho de Jesus.
Jornalista: Domingos Piedade Freitas
Editora: Rita Almeida
