DILI, 27 setembru 2019 (TATOLI) – Ministru Justisa, Manuel Cárceres, deklara nia parte prontu esplika estatutu Rai Kaitehu, Aldeia Mota Ikun, Suku Mota Ulun, Postu Administrativu Bazartete, Munisípiu Liquiçá nian ba deputadu sira iha Parlamentu Nasionál (PN).
Ministru Cárceres rasik simu tiha ona relatóriu kompletu kona-ba estatutu rai Kaitehu nian husi Diretór Terra no Propriedade Munisípiu Liquiçá, Tito Serrão da Silva foin lalais ne’e.
Notísia Relevante: DTP Liquiçá Laiha Koñesimentu Prezensa Kompañia Marino Enterprise
“Governu maka sei ba esplika entre Parlamentu no Governu, la’ós jornalista sira”, dehan Manuel Cárceres bainhira hataan pergunta husi jornalista iha Palásiu Governu, sesta ne’e.
Nune’e, nia husu ba públiku atu hein no kalma hodi fó tempu ba nia hodi sobu ‘mafia’ sira ne’ebé deskonfia hamosu disputa rai iha Kaitehu.
Notísia Relevante: Bankada Governu Husu Ministru Cárceres Deskobre Ona ‘Mafia’ Justisa
Governante ne’e ko’alia asuntu ne’e relasiona ho preokupasaun deputadu sira hodi husu ba Governu atu esplika problema rai Kaitehu ne’ebé hamosu polémika entre Kompañia Marino Entreprise no Kompañia China Harbour, to’o halo eis Primeiru-Ministru, Kay Rala Xanana Gusmão hirus no sobu lutu ne’ebé Kompañia Marino Entreprise monta hodi taka atividade servisu Kompañia China Harbour nian.
Jornalista: Julia Chatarina
Editór: Xisto Freitas
