DILI, 01 outubru 2019 (TATOLI)-Produtór Filme husi Estadu Unido Amérika (EUA), Dawn Valadez ho Alrick Brown, fahe esperiénsia ba Produtór filme timoroan hamutuk na´in 20.
Embaixadora EUA ba Timor-Leste, Kathleen Fitzpatrick ba jornalista sira katak EUA apoiu festivál Dili internasionál.
“Estadu Unidu iha filme barak iha festivál ne’e. Down iha filme iha ne’e, Alrick iha espertu iha filme iha seniproperties,” informa diplomata Kathleen Fitzpatrick iha embaixada EUA, Praia dos Coqueiros, Dili, ohin.
Embaixadora Kathelen Fitzpatrick reforsa, Dom ho Albert halo semináriu sira kona-ba filme, filme kona-ba edukasaun, kona-ba oinsá halo filme, kona-ba entrainementu ho Uniaun Seniastu Timor-Leste.
“Ami orgullu tebes apoia festivál internasional Dili, ami apoia festivál ne’e. Ami iha konvidadu sira husi Estadus Unidu ba halo formasaun esperta ba indústria filme nian iha Timor-Leste,” tenik embaixadora Amérika ne’e.
Iha parte seluk, Diretora Dili Internasional Film Festival no Pixelasia/ DIFF, Lena Lenzen informa katak festivál ba tinan ida ne’e foin primeira vez. “Ha´u kontente tebes, filme husi mundu tomak atu tuir kompetisaun depois iha Timor-Leste ami akomula kriadór filme grupu na’in hitu ne’ebé hola parte iha kompetisaun filme lokál, depois ami mós atu halo prémiu ba kriadór filme lokál sira”.
“Filme lokál hamutuk hitu, nune’e tópiku foti asaun, sira-nia dezafiu mak kria filme iha minutu sanulu de’it ho tópiku foti asaun, oinsá bele foti asaun iha dalan ne’ebé positivu,” katak Diretora DIFF ne’e.
Diretora DIFF Lena Lenzen katak, kontente no orgullu tebes fó oportunidade ba kriador filme lokál sira atu hatudu sira-nia koñesimentu, atu hatudu sira-nia ideia, konta sira-nia istoria.
Nia hatutan tan katak, halo workshop no semináriu barak ho apoiu husi embaixada EUA nian. “Ami halo workshop balun ho kriadór filme na’in rua husi Amérika, ami halo loron tomak iha Fundasaun Oriente”.
“Ami mós halo buat ne’ebé interesante tebes, bolu filme filmaces came, atividade ne’e sei hala’o iha loron ha’at ba estudante na´in rua nulu husi UNTL-Komunikasaun Sosiál nian no sira-nia dezafiu atu prodús duni filme badak iha loron ha’at de’it,” tenik diretora ne’e.
Nia konsidera eventu ne´e interesante duni no mós atu hatudu katak sira mai husi Amérika oinsá mak sira aprende mós husi Timor-Leste. “Ha’u kontente tebes ho apoiu embaixada”.
Entertantu, workshop ne´e realiza tanba kolaborasaun DILI Internasionál Film Festival no Uniaun Film Timor-Leste. Espesialista Filme Amerikanu na’in rua sai parte sentrál iha festivál filme nian, hahú husi loron 1-7 fulan ne’e.
Notísia relevante:DIFF Lansa Portál Ba Kompetisaun Prodús Filme Badak
Jornalista : Nelia Fernandes
Editor : Rafy Belo
