DILI, 01 outubru 2019 (TATOLI) – Governu Japaun halo hela diskusaun ho Governu Timor-Leste (TL) kona-ba rekualifikasaun Aeroportu Internasionál Nicolau Lobato, Dili.
Governu Japaun hakarak atu kontinua halo diskusaun ba asuntu sira ne’ebé nesesáriu ho Governu TL.
Tuir informasaun ne’ebé Tatoli asesu, ohin, katak Governu Japaun prontu atu apoiu Governu TL hodi hadi’ak aeroportu.
“Ami halo hela diskusaun atu haree ba kestaun ne’e. Ami hatene katak Governu Timor-Leste organiza ona komisaun interministeriál no internamente diskute daudaun ona asuntu ne’e”.
Governu Japaun diskute dala barak ona, kona-ba melloramentu aeroportu ho Governu TL, ekipa Japan International Cooperation Agency (JICA) nian iha TL iha tinan kotuk no mós tinan ida ne’e.
Hosi diskusaun sira ne’e, diskute no konkorda ona komponente projetu nian ho Governu TL, bazeia ba akordu, Japaun formalmente aprova ona projetu refere.
Durante ne’e, Governu Japaun halo ona enkontru dala 20-resin ho ministériu relevante hosi Governu TL nian no halo ona konferénsia imprensa da rua ona.
Rekualifikasaun Aeroportu Internasionál Prezidente Nicolau Lobato konta ho apoiu finanseiru husi Governu Japaun ho grant millaun $44.
Notísia relevante : Governu Hahú Diskute Rekualifikasaun Aeroportu Dili
Jornalista : Zezito Silva
Editora : Maria Auxiliadora
