COVALIMA, 01 outubru 2019 (TATOLI)-Diretór Servisu Edukasaun Munisipál Covalima, Edmundo Ferreira informa katak infraestrutura bázika hanesan sala aula nian, meza kadeira, bee moos inklui estrada no biblioteka sai problema ba estudante sira iha estabelesimentu ensinu sira iha Munisípiu Covalima.
Problema estrada sai kestaun bo’ot ba estudante sira iha postu Mau-katar, Fohorem, Fatumean, Fatululik no Zumalai. Postu sira ne’e kategoria área rurál. To’o agora kondisaun estrada la di´ak kuandu tempu ida labarik sira labele ona asesu ba eskola tanba tenke hakur mota, depois distánsia eskola ho sira nia uma kuaze kilometru 3 to’o 4.
“To’o agora problema ne’e seidauk rezolve entaun asuntu ne’e sai konsekuénsia bo’ot ba labarik sira inklui profesór balun,” hateten Diretór Edmundu Ferreira ba jornalista Ajénsia TATOLI iha ninia Gabineti Ministeriu Edukasaun Suai vila, tersa (01/10/2019).
Nia hatutan, alende estrada, problema seluk mak fornesementu bee ba eskola sira mos paradu. “Infraestrutura bázika ne’ebé governu hadi´a labele funsiona, entaun estudante barak kuandu situasaunn obriga sira halai ba ailaran,” informa Diretór Edmundo Ferreira.
Totál eskola sira iha Munisípiu Covalima, tuir ezekutivu ne´e hamutuk 129. Edukasaun pré-eskolár 25, Ensinu Báziku Sentrál (EBC) 25, Ensinu Báziku Filiál (EBF) 79.
Ensinu Sekundária Jerál (ESG) rua, Ensinu Sekundária Téknika Vokasionál (ESTV) lima inklui CAFE (Centro de Aprendizagem e Formação Escolar) ida.
“Problema kuaze atu hanesan de’it. Tanba ne’e mak edukasaun munisipál atu tau atensaun hodi bele rezolve problema estudante sira nian liuliu kona-ba kadeira meza inklui biblioteka no bee moos,” konklui Diretór Edmundo Ferreira.
Jornalista: Tomé Amado
Editór : Rafy Belo
