DILI, 01 outubru 2019 (TATOLI) – Diretór Jerál Turizmu, Ministériu Turizmu, Komérsiu no Indústria (MTKI), José Filipe Dias Quintas, hateten reseita ne’ebé rekolla husi sítiu Na’in-Feto Ramelau hahú husi janeiru to’o maiu 2019 hamutuk $800.
“Ami-nia estimasaun durante fulan-janeiru to’o maiu ne’e ita rekolla ona $800-resin ne’e mak uluk ita sei aplika kontribuisaun ba estudante sira sentavu 25, maibé kada vez balun lakohi kontribui ne’e mak ita haree númeru vizitante ne’e aas, maibé ita-nia kontribuisaun seidauk másima”, Diretór Jerál José Quintas informa iha Pasu Episkopál-Lesidere, ohin.
Tanba ne’e, ho desizaun ekipa task force ne’ebé deside ona kontribuisaun husi sentavu 25 ba dólar ida bele ona aumenta reseita iha fin du anu ne’e.
Ekipa task force ne’e kompostu husi relijiozu ka Dioseze Dili, Ministériu Turizmu, Komérsiu no Indústria, Ministériu Agrikultura no Peska, Sekretáriu Estadu Ambiente, Sekretáriu Estadu Komunikasaun Sosiál, no Autoridade Lokál Munisípiu Ainaru.
“Ami deside ba dólar ida, para oinsá osan ne’e atu reforsa jestaun karik fatin lixu balun aat bele hadi’a no seluk tan. Ne’e la’ós retribuisaun tanba presiza lei ka diploma ministeriál ne’ebé hanesan kontribuisaun de’it”.
Nia kontinua husu ba vizitante sira atu la’ós fó kontribuisaun osan de’it, maibé kontinua asegura ka soe lixu iha fatin no labele estraga sinál sira ne’ebé monta ona iha fatin sagradu ne’e.
Notísia relevante : Vizita Na’in-Feto Ramelau Presiza Kontribui Dólar Ida
Jornalista : Florencio Miranda Ximenes
Editora : Maria Auxiliadora
