DILI, 02 outubru 2019 (TATOLI) – Governu liuhosi Ministériu Turizmu, Komérsiu no Indústria (MTKI), Ministériu Administrasaun Estatál, Polísia Nasionál Timor-Leste (PNTL) Munisípiu Dili, Prezidente Autoridade Munisípiu Dili fó data ikus ba Negosiante Kampung Alor atu husik fatin mamuk hahú ohin to’o loron 9 fulan ne’e.
Nune’e totál negosiante sidadaun Indonézia hamutuk 207 iha Kampung Alor na’in-50 mak asina ona kontratu ho Kompañia China Development hodi muda bá Golgota.
“Governu deside ona hahú husi ohin negosiante tenke hahú arruma ona sasán atu sira ne’ebé sasán prontu bele muda ona hodi to’o 9 outubru ne’e laiha ona atividade negósiu iha fatin ne’e”, Diretora Nasionál Regulasaun Komersiál no Protesaun Konsumidór, MTKI Manuela da Silva Tilman, afirma hafoin alerta desizaun Governu ba Negosiante, uma-na’in no traballadór sira iha Sede Suku Kampung Alor, ohin.
Diretora Manuela da Silva Tilman friza Governu mós deside ona laiha negosiasaun ba negosiante sira iha Kampung Alor hodi deside hakarak muda ou lae, maibé tenke muda ona.
“Hakarak ka lakohi atividade negósiu iha Kampung Alor ne’e tenke hapara tanba Governu prepara ona fatin Luxu no dignu ba negosiante sira ne’ebé maioria sidadaun Indonéziu”, katak.
Governu prepara transporte hodi fasilita negosiante sira bainhira arruma ona sasán hodi lori bá Golgota hahú kuarta ne’e to’o 9 outubru. “Ita sei akompaña sira (negosiante) hodi fasilita tula sasán bá Golgota”, nia afirma.
Nune’e, Diretora ne’e husu ba negosiante sira atu koopera ho parte kompetente sira hodi muda sai ona.
Iha fatin hanesan, Prezidente Autoridade Munisípiu Dili, Gaspar Soares, husu ba negosiante, rai na’in no traballadór sira atu kontribui ba desizaun ne’ebé Governu hasai ona.
“Ha’u husu ho haraik aan atu negosiante na’in-50 ne’ebé asina ona kontratu bele arruma ona sasán hodi muda bá fatin negósiu foun iha Golgota”, sujere.
Ba Negosiante ne’ebé seidauk asina kontratu, nia husu atu hahú agora buka ona meiu ka fatin negósiu seluk hodi muda, molok to’o 9 outubru.
Razaun Governu deside muda, Gaspar afirma tanba iha área ne’e besik liu Meskita ne’ebé sai ona patrimóniu Estadu no polítika urbanizasaun.
“Negosiante sira tenke hamamuk fatin ne’e tanba ita lakohi iha atividade seluk ne’ebé afeta ba atividade Meskita nian bainhira ema hakarak reza. Hahú ohin ba 9 outubru mak negosiante balun sei hala’o negósiu iha ne’e, sei foti konsekuénsia rasik tanba la tuir ona desizaun Governu”, akresenta.
Komandante Polisia Munisípiu Dili, Superintendente Xefe Armando Monteiro, dehan prezensa polísia iha atu asegura desizaun ne’ebé Governu hatún ona. “Ami pontu asegura negosiante sira ba Golgota”, katak.
Reprezentante Embaixadór Indonézia, atuál Adidu Polísia Indonézia Iha Timor-Leste (KOMBESPOL) Muji Diah Seatini, husu ba vendedór sidadaun indonéziu atu hakru’uk no apoia ba desizaun ne’ebé Governu foti ona.
“Maibé husu atu kontinua asegura seguransa husi fatin ne’e bá fatin foun”, nia husu.
Jornalista : Florencio Miranda Ximenes
Editora : Maria Auxiliadora
