DILI, 2 outubru 2019 (TATOLI) – Governu liuhosi reuniaun Konsellu Ministru, kuarta ne’e, aprova ona Proposta Lei Orsamentu Jerál Estadu (OJE) 2020 ho totál biliaun $1,950.
“Ohin aprova ona proposta orsamentu 2020 nian ho montante hamutuk biliaun $1,950. Hosi osan ne’e millaun $73 ba impréstimu no bainhira ita hasai tiha impréstimu entaun totál orsamentu biliaun $1,887”, tenik Ministra Finansa ein-ezersísiu, Sara Lobo Brites, iha Palásiu Governu hafoin reuniaun ezekutivu.
Tuir Governante ne’e, impréstimu ne’e ba projetu sira ne’ebé mak kontinua implementa, liliu ba projetu estrada hodi haree ba kontinuasaun konetividade no montante ne’e sei dezembolsu iha 2020.
Notísia Relevante: Governu Aprova Ona Tetu Fiskál 2020
Nia esplika, bainhira fahe tuir kategoria saláriu no vensimentu millaun $241,271, bens no servisu millaun $738,428, transferénsia públika millaun $457,773, kapitál menór millaun $53,267 no kapitál dezenvolvimentu millaun $459,260.
“Ne’e mak ohin aprova. Agora tékniku sira sei halo hela apuramentu no aselera hela nia prosesu atu 15 outubru agora Governu bele submete ona ba Parlamentu Nasionál”, nia akresenta.
Hanesan orsamentu kada tinan, orsamentu Estadu liuhosi fonte haat hanesan Rendimentu Sustentável Estimadu (RSE), Fundu Petrolíferu, Reseita Doméstika, Doasaun no Impréstimu.
Iha OJE 2020, Governu kontinua foti liu RSE ne’ebé ho kalkulasaun millaun $536,8, nune’e foti liu RSE hamutuk millaun $929,9, enkuantu husi Fundu Petrolíferu hamutuk billaun $1,466.
“Orsamentu hirak ne’e atu bele ajuda ita-nia finansiamentu no ita mós inklui iha finansiamentu tinan-oin ho saldo husi tezouru porvolta millaun $200”, nia dehan tan.
Sara Lobo subliña, aprovasaun tetu fiskál 2020 iha Konsellu Ministru hamutuk biliaun $1,6 maibé iha diskusaun Komité Revizaun Orsamentu Polítiku (KROP) iha mudansa uituan bazeia proposta husi ministériu sira.
Notísia Relevante: KROP Finaliza ona Diskusaun OJE 2020 ba Liña Ministériu Sira
“Ita mós halo provider statement ne’ebé mak ita rekolla informasaun hotu husi ministériu no informa katak biliaun $1,6 maibé hafoin diskusaun iha KROP, ministru sira aprezenta sira-nia proposta ne’ebé presiza duni hetan atensaun”, nia haklaken.
Ba tinan oin, Governu tau nafatin atensaun ba iha área sira hanesan saúde, edukasaun, agrikultura no infraestrutura.
“Infraestrutura ne’e nafatin ho konetividade hanesan estrada, nune’e mós ba bee no saneamentu sai atensaun liubá Governu tanba ne’e hakarak tau iha orsamentu 2020”, nia dehan tan.
Kona-ba edukasaun, sei halo konstrusaun ba sala aula ne’ebé konsidera hanesan prioridade.
Nune’e mós ba programa sira iha área rurál ne’ebé sei implementa husi Ministériu Administrasaun Estatál (MAE).
“Ida ne’e kontinuasaun programa sira ne’ebé Governu atu investe liu iha kapitál sosiál”, nia tenik.
Nia informa, Governu kontinua fó kontribuisaun boot ba investimentu iha área petrolífera nian.
“Ho determinasaun ba ita-nia tasi entaun ita presiza atu sosa infraestrutura boot sira hanesan ró para bele halo patrulla iha ita-nia fronteira marítima”, nia dehan.
Governu mós sei tau atensaun maka’as ba investimentu iha Timor GAP,EP, liliu atividade ne’ebé presiza hetan apoiu para bele dezenvolve projetu ne’ebé mak liga ho esplorasaun petrolífera nian.
Entretantu, OJE 2020 hanesan orsamentu boot liu ne’ebé VIII Governu Konstitusionál propoin kompara ho orsamentu annuál anteriór dezde ukun-aan.
Orsamentu ho montante boot liu iha OJE 2016, ne’ebé hafoin hetan retifikasaun hodi aumenta ba millaun $391, ikus mai despeza ba tinan 2016 ho montante biliaun $1,952,9.
Ba OJE 2019, Prezidente Repúblika (PR), Francisco Guterres Lú Olo, promulga ho montante biliaun $1,482, hafoin hasai orsamentu milliaun $650 hodi sosa partisipasaun konsórsiu iha projetu Greater Sunrise.
Husi montante ne’e, distribui ba kategoria saláriu no vensimentu milliaun $214, bens no servisu milliaun $472,9, transferénsia públika milliaun $362, kapitál menór milliaun $31,2 no kapitál dezenvolvimentu milliaun $400,7.
Enkuantu ba OJE 2018 hamutuk biliaun $1,279, ne’ebé fahe ba kategoria saláriu no vensimentu millaun $200,312, bens no servisu millaun $421,666, transferénsia públika millaun 261,925, kapitál menór millaun $3,659, kapitál dezenvolvimentu millaun $392,037.
Jornalista: Julia Chatarina
Editór: Xisto Freitas
