DILI, O3 outubru 2019 (TATOLI) – Kompañia Internasionál ION Geophysical husi Kuala Lumpur, Malázia, hala’o ona estudu viabilidade sízmiku iha área jeofízika no ambientál hatudu katak fásil halo esplorasaun Mina no Gás iha tasi-laran no rai-maran iha Timor-Leste (TL) nia jurizdisaun.
Vise-Prezidente Ázia Pasífiku ION Geophysical, Jason Robinson, hateten sira halo ona estudu sízmiku no jeofízika no ambientál hatudu Timor-Leste iha poténsia atu investidór ka operadór petrolíferu fásil hala’o esplorasaun.
“Ambiente iha Timor-Leste di’ak tebes no la susar atu halo esplorasaun ba mina no gas”, Vise-Prezidente Ázia Pasífiku ION Geophysical hatete iha Simeira Internasionál Mina no Gás, iha Sentru Konvensaun Dili, ohin.
Nia salienta ho esperansa boot empreza barak mak interese atu mai investe iha setór esplorasaun petrolífera iha Timor-Leste.
“Ami haree kompañia barak iha interese atu investe tanba ambiente di’ak tebes no la susar halo esplorasaun”, katak.
Nune’e, Jason Robinson husu ba operadór petrolíferu internasionál sira atubele mai investe iha Timor-Leste.
Iha fatin hanesan, Prezidente Autoridade Nasionál Petróleu no Minerál (ANPM), Gualdino da Silva, hatutan kompañia ION Geophysical hala’o ona estudu hodi hatene ambiente iha Timor-Leste.
“Ita-nia ambiente iha Timor-Leste ne’e oinsá? Entaun ita presiza uza sira (ION Geophysical) atu esplika ba operadór petrolífera sira. Ita Timór de’it mak ko’alia ne’e investidór sira dehan ladún tau fiar atu tau osan”, dehan nia.
Tanba ne’e ION Geophysical hala’o ona estudu sízmiku, nune’e liuhusi sira mak konvense ema internasionál atu investe iha Timor-Leste.
Simeira Internasionál ne’e lansa husi Primeiru-Ministru Taur Matan Ruak no lansa mós konkursu públika ba bloku 18 kompostu Mina no Gás iha rai-maran hitu no tasi-laran hamutuk bloku 11, ne’ebé mak loke ba segunda ronda nian.
Notísia relevante : Ohin, Simeira Internasionál Mina no Gás no Lansamentu Segunda Ronda Kontratu Fahe Produsaun
Jornalista : Florencio Miranda Ximenes
Editora : Maria Auxiliadora
