DILI, 03 outubru 2019 (TATOLI) – Komisaun Anti Korrupsaun (CAC-sigla portugés), ohin, hala’o sensibilizasaun kona-ba prevensaun korrupsaun no promove boa governasaun iha Munisípiu Lautem.
Notisia Relevante : KAK Kontinua Halo Sosializasaun ba Prevensaun Korrupsaun
Hola parte iha atividade importante no interesante ne’e mai husi xefe aldeia, xefe suku, funsionáriu administrasaun munisípiu sira no mós xefe departamentu ministériu ida-idak nian iha Lautem.
“Iha Minisipiu Lautem, ami hala’o iha fatin rua mak hanesan Tutuala no Lautem, hodi fahe material balun relasiona ho kompeténsia KAK nian kona-ba prevensaun korrupsaun ho sensibiliza maneira legal utilizasaun veíkulu Estadu nian,” informa Adjuntu Komisáriu KAK, Luis de Oliveira Sampaio, ohin, ba Ajénsia TATOLI via telefónika.
Iha biban nee mós, KAK halo observasaun ba instituisaun estadu sira nia serbisu, difikuldade, problema hodi identifika buat balun, atu bele propoin ba iha liña ministeriais atu tau atensaun.
Atividade hanesan KAK halo uluk ona iha Munisípiu Covalima ne’ebé KAK identifika katak iha postu saúde balun la iha ai-moruk, doutór sira la halo sira nia serbisu iha postu saúde, profesores balun la tama aulas, merenda eskolár balun la lao no problema seluk-seluk tan.
Jornalista : Domingos Piedade Freitas
Editór : Francisco Simões
