DILI, 04 outubru 2019 ( TATOLI)-Vise-Ministra Kuidadu Saúde Primária, Elia dos Reis Amaral realiza vizita regulár ba HNGV (Ospitál Nasionál Guido Valadares), ohin. Iha vizita ne´e, vise-ministra identifika AC ka ár kondisionadu la funsiona iha sala pediatria.
“Ha´u mai vizita ne’e, indentifika katak iha pediatria nian AC la funsiona, entaun ida ne’e tau atensaun no presiza sama atensaun ba responsabilidade sira ne’ebé mak halo manutensaun parte relevante hodi responde imediata,” informa Vise-Ministra Elia dos Reis Amaral ba jornalista sira hafoin vizita iha HNGV.
Iha tinan ida ne’e, ICCU sei balansu ho ICU ne’ebé mak harii daudauk, hanoin tempu badak ita sei reponde ba situasaun ICU ne’ebé nakonu no ICCU estabelese ita bele responde ba situasaun ida ne’e,” informa tan governante ne´e.
Iha biban hanesan, Vise-Ministra Kuidadu Saúde Primária, Elia dos Reis Amaral hateten, Orsamentu Jerál Estadu prevé ba iha tinan 2020 hamutuk 12 milloes itál.
“Orsamentu ne’e sufisiente ona ba HNGV, normalmemte halo ona planu identifikasaun, depois planu ne’ebé iha enkaixa no mós ba aprovasaun ita sei hein no komisaun sira sei responde ba ida ne’e,” dehan Vise-Ministra, Elia dos Reis Amaral.
“Ha´u mai vizita regulár ida iha HNGV hodi tutela ba profisionál autonomu sira husi xefe departamentu sirúrjia, medisina interna, pediatria, maternidade, farmasia no nutrisaun, laboratóriu, Banco de Sangue, radiolojia, oftamolojia, reprezentante médiku kubanu no médiku Xina,” hatutan vise-ministra.
Kona-ba vizita ne´e, Governante ne´e esplika, hanesan superiór másimu ba instituisaun relevante, nia obrigatóriu vizita regulár ba HNGV hodi akompaña servisu dirijente sira ne’e halo husi dirijente tuun ba iha departamentu sira, espesialidade sira, atu akompaña, rona, hodi nune’e saida mak nia bele apoiu no hasa’e kualidade ba iha atendimentu ba pasiente sira.
Jornalista: Felicidade Ximenes
Editór : Rafy Belo
