ILIOMAR, 05 outubru 2019 (TATOLI) – Vise Prezidente Agência Tatoli, Manuel Pinto, esplika ezisténsia Tatoli nu’udar fonte informasaun Estadu ne’ebé divulga informasaun liuhosi plataforma online, tanba internet hahú invade Timor-Leste.
Nia hato’o lia hirak ne’e, bainhira hala’o diálogu ho estudante na’in-500 resin husi Ensinu Báziku no Sekundáriu iha salaun Parókia Nossa Senhora de Graça, iha Postu Administrativu Iliomar, Munisípiu Lautém, sábadu ne’e, ho tema “Promove mídia saudável no internet saudável”.
“Tatoli mai tanba bainhira internet mai invade iha Timor-Leste. Ita labele lakon atu notísia ne’e loke de’it iha jornál ka rona de’it iha rádiu, maibé mós ita tenke utiliza meiu iha internet”, nia tenik.
Nune’e, nia husu ba estudante sira atu kuidadu bainhira asesu informasaun liuhosi internet ne’ebé invade ona iha ema hotu nia leet maibé ema la sente no husu atu estudante sira bele utiliza internet ba buat pozitivu.
“Imi tenke kuidadu tanba era ida agora ne’e invazaun boot ida mosu iha ita-nia leet maibé ita la sente. Nia mak internet ne’ebé maioria ema barak uza tanba ne’e ita tenke uza ho kuidadu,” nia fó hanoin.
Tanba ne’e, Manuel Pinto husu estudante sira atu bele ‘matenek’ asesu informasaun liuhosi meiu internet atu bele hetan informasaun ne’ebé di’ak no kredível.
“Tatoli fó sai informasaun ne’ebé ho loloos kedas no bainhira notísia ida atu tuun iha Tatoli ami sei haree antes ami publika notísia ne’e, nia impaktu di’ak ka la di’ak”, nia akresenta.
Nia mós konvida estudante sira atu bele asesu Tatoli liuhosi meiu mídia sosiál, nune’e bele hetan informasaun kona-ba lala’ok rai-laran.
“Bainhira atu asesu informasaun iha mídia sosiál hanesan internet di’ak liu loke Tatoli tanba Tatoli mak fó sai informasaun ne’ebé kredível no loloos ba públiku”, nia dehan tan.
Biban ida ne’e, la haluha mós nia esplika kona-ba lala’ok Tatoli nu’udar Ajénsia Notisioza Timor-Leste.
“Agência Tatoli ne’e hanesan ajénsia estadu-nian ne’ebé foun. Ha’u kompara karik hanesan Lusa, Portugal nian, Indonézia nian mak ema hanaran Kantor Berita Antara”, nia subliña.
Nia hatutan: “Tatoli moris hosi Governu da-neen, ne’ebé kria embriaun ne’e ho objetivu atu kria balansu, atu enkoraja ema, fó forsa ba ema bainhira atu asesu informasaun balu keta falsu karik bele asesu uluk Tatoli tanba hanesan fonte ofisiál Estadu nian”.
Agência Tatoli foin lalais ne’e selebra ninia aniversáriu ba datoluk (27 jullu 2016-27 jullu 2019) no sai ona hanesan Institutu Públiku.
Jornalista: Hortençio Sanchez
Editór: Xisto Freitas
