DILI, 08 setembru 2019 (TATOLI) – Komandante ba Arguido JPA iha Instituisaun Polisia Nasional Timor-Leste (PNTL) la iha koñesimentu ba motivu husi arguido JPA uza pistola hodi tiru vítima sira iha festa Kulu-hun.
Notísia Relevante : Kazu Kulu-hun, Sasin Deklara Arguido Sira Mak Tiru iha Tenda Laran
Liu husi kontinuasaun audiénsia julgamentu ba kazu Kulu-hun, ohin, Tribunal Distritál Dili (TDD) aprezenta komandante polisia husi arguido JPD nu’udar sasin hateten, nia koñese arguido JPA iha instituisaun laran ne’ebé karater ema kómiku ten. Maibé bainhira akontese kazu Kulu-hun rona fali dehan, arguido JPA mak tiru ne’e halo nia parte mós hakfodak.
Komandante nee esplika katak polisia sira uza pistola iha tempu serbisu de’it no kuandu fora husi serbisu labele uza kilat ka pistola.
“Ami halo inspesaun ba bala musan, semana-semana, kuandu Polisia sira tiru buat ruma sira tenke halo relatóriu,” hateten sasin ne’e.
Pistola ne’ebé arguido JPA lori ho marka EE H 747, kada membru ida iha kartús mínimu 15, objetivu uza pistola mak kuandu hala’o serbisu seguransa nian atu akalma situasaun mak tiru sa’e dala tolu no próteze aan.
Nia hateten, kuandu labele rezolve ona mak tenke kontaktu mai iha komandu jerál PNTL atu foti desizaun hodi asegura lalais problema nee.
“Ha’u rona informasaun katak arguido JPA mak tiru ema iha Kulu-hun maibé ho razaun saida ha’u la hatene,” nia tenik.
Kuandu membru ida mak ho kondisaun lanu mak hala’o serbisu la autoriza atu lori kilat.
Rona tiha deklarasaun sain ne’e nian, Tribunal adia fali kontinuasaun julgamentu ba iha loron 25 outubru 2019, tuku 14:00 OTL, hodi rona sasin nain tolu tan hanesan Polisia intelijente Maritima, Komandante Lojístika PNTL ne’ebé fahe bala musan no Polisia Investigasaun Kriminál (PSIK) ne’ebé mak halo ejame balístiku.
Audiénsia julgamentu nee prezide husi juis koletivu Sribuana da Costa, Edite Palmira, juis estaziadu, Ministériu Públiku reprezenta husi Prokuradór Jacinto Babo, arguido sira hetan asisténsia legal husi Defensór Públiku Eustáquio Guterres, advogadu Privadu Pedro Aparicio Guterres.
Jornalista : Domingos Piedade Freitas
Editór : Francisco Simões
