COVALIMA 09 Outubru 2019 (TATOLI)-Administradór Munisípiu Covalima, Afonso Nogueira Nahak dehan, atu rezolve krize bee moos ne’ebé iha Covalima presiza dada bee moos husi área Suku Dato Rua no Dato Tolu nian.
Afonso dehan, sira parte ba identifika ona bee matan husi suku rua ne’e sai ho volume boot no tempu bailoro naruk mós bee ne’e la maran. Distánsia bee matan ne’e ba Covalima vila kuaze kilómetru 15.
“Atu hakotu problema bee moos ne’e, úniku solusaun maka ita tenki dada bee moos husi Suku Datu Rua no Dato Tolu mai Covalima ho distánsia kilómetru 15. Atu nune’e, ita fornese bee moos ba komunidade no fornese bee ba projetu boot sira ne’ebé sei harii ha Covalima,” informa Administradór Covalima Afonso ba Ajénsia Tatoli iha Covalima foin lalais ne’e.
Nia dehan, se bee moos rua bee la sufisiente, bele dada fali bee husi Mota Postu Administrativu Hatubilico-Ramelau-Ainaru nian ba Covalima tuir Planu Estratéjiku Dezenvolvimentu Nasionál (PEDN) 2011-2030.
Afonso hatutan, sira nia parte rasik aprezenta ona proposta dada bee moos ne’e ba Ministériu Obra Publika atu prevee iha Orsamentu Jerál Estadu (OJE) 2020.
Tuir nia, dalan seluk tan maka sira sei aprezenta proposta ida ba Programa Nasionál Dezenvolvimentu Suku (PNDS) nian no Planu Dezenvolvimentu Nasionál (PDN) atu haree hodi prevee mós orsamentu.
Entretantu kona-ba prosesu instalasaun projetu kanu dada bee moos ba povu Covalima sira nia uma, Afonso Nogueira esplika tuir relatóriu Diresaun Nasionál Água no Saneamentu (DNAS) katak, povu ne’ebé asesu ona bee moos too ona %74 no falta %26.
“Komunidade ne’ebé asesu ona bee moos too ona $74, so falta de’it %26 maka povu ladauk hetan bee moos maka iha suku rua, Asucai no Suku Mape. Problema ida tan maka, agora tempu bailoro povu hotu-hotu halerik ba problema bee moos, tanba bee matan sira maran hotu,” nia hatete.
Atu hakotu problema bee moos iha Covalima, sira hetan mós apoiu husi Organizasaun Naun Governamentál (ONG) hodi fura bee posu ba iha kada suku no aldeia sira ne’ebé pertense ba Suai Vila nian.
Entretantu, tuir observasaun Tatoli nota, iha Suai vila komunidade sira kuaze loro-loron lori masa ka jeregen tula iha karrosa no motór ho karreta ba kuru iha bee matan ne’ebé besik no komunidade balun tenki sosa bee moos ho karreta litru 5000 ho presu $30.
Jornalista : Eugénio Pereira
Editór: Rafy Belo
