DILI, 09 outubru 2019 (TATOLI) – Ekipa interministeriál lima hanesan Ministru Prezidénsia Konsellu Ministru, Ministru Transporte no Komunikasaun, Ministru Obra Públika, Ministru Finansa no Ministru Negósiu Estranjeiru no Kooperasaun envolve iha re negosiasaun ba dezeñu aeroportu Dili.
“Esforsu hosi ekipa ministeriál sira no tékniku sira kontinua hala’o serbisu hodi ko’alia ho Governu Japaun atu tau konsiderasaun ba ida ne’e”, dehan Ministru Transporte no Komunikasaun, José Agostinho ba jornalista sira iha Palásiu Governu, ohin.
Daudaun ne’e, ekipa interministeriál hamutuk ho ekipa téknika sira esforsu oinsá maka sira bele finaliza planu mestre bainhira tama iha konstrusaun karik, empreza ne’ebé maka kaer obra ne’e halo tuir dezeñu ne’ebé iha no tuir planu integradu ne’ebé di’ak ho baze kompromisu Governu Timor-Leste.
“Ha’u hanoin planu ne’e integradu, nia rezultadu tenke di’ak, ita nian kompromisu aeroportu tenke di’ak”, dehan.
Antes ne’e, Governu Japaun halo hela diskusaun ho Governu Timor-Leste (TL) kona-ba rekualifikasaun Aeroportu Internasionál Nicolau Lobato, Dili.
Governu Japaun hakarak atu kontinua halo diskusaun ba asuntu sira ne’ebé nesesáriu ho Governu TL. Governu Japaun prontu atu apoiu Governu TL hodi hadi’ak aeroportu.
“Ami halo hela diskusaun atu haree ba kestaun ne’e. Ami hatene katak Governu Timor-Leste organiza ona komisaun interministeriál no internamente diskute daudaun ona asuntu ne’e”, haktuir informasaun ne’ebé Tatoli asesu foin lalais ne’e.
Governu Japaun diskute dala barak ona, kona-ba melloramentu aeroportu ho Governu TL, ekipa Japan International Cooperation Agency (JICA) nian iha TL iha tinan kotuk no mós tinan ida ne’e.
Hosi diskusaun sira ne’e, diskute no konkorda ona komponente projetu nian ho Governu TL, bazeia ba akordu, Japaun formalmente aprova ona projetu refere.
Durante ne’e, Governu Japaun halo ona enkontru dala 20-resin ho ministériu relevante hosi Governu TL nian no halo ona konferénsia imprensa dala rua ona.
Rekualifikasaun Aeroportu Internasionál Prezidente Nicolau Lobato konta ho apoiu finanseiru husi Governu Japaun ho grant millaun $44.
Notísia relevante : Governu Hahú Diskute Rekualifikasaun Aeroportu Dili
Jornalista : Natalino Costa
Editora : Maria Auxiliadora
