DILI, 9 outubru 2019 (TATOLI) – Prezidente Federasaun Voleiból Timor-Leste, Inocêncio Araújo da Silva, hateten sira simu ona karta hosi Sekretaria Estadu Juventude no Desportu iha agostu liubá atu hamamuk fatin ne’ebé sira okupa hela.
Tanba ne’e, nia deklara, Federasaun Voleiból Timor-Leste (FVTL) prontu kontribui hodi hamamuk fatin ne’ebé sira utiliza hela hanesan edifísiu para fó biban ba Governu halo reabilitasaun.
Lee mós: Nélio Isaac Husu Federasaun Ne’ebé Okupa Jináziu Dili Koopera ho Governu
“Ita tenke kontribui tanba ne’e ba dezenvolvimentu nasaun nian, liliu kria fasilidade ne’ebé di’ak ba atividade desportu. Nune’e mak Federasaun Voleiból ita iha alternativu tanba uluk kria hela sede ida ba Liga ninian entaun bele muda ba iha ne’ebá provizoriamente,” tenik Inocêncio ba Agência Tatoli iha Jináziu Dili, kuarta ne’e.
Nia dehan, FVTL laiha kestaun ba desizaun tomak ne’ebé Governu deside tanba halo di’ak ba nasaun nia futuru.
Entretantu, objetivu reabilitasaun ba Jináziu Dili atu prepara ba jogu Komunidade Nasaun Ko’alia Lian Portugês (CPLP- sigla Portugês) ne’ebé Timor-Leste mak sei sai hanesan uma-na’in iha 2020.
Jornalista: Hortençio Sanchez
Editór: Xisto Freitas
