DILI, 09 outubru 2019 (TATOLI) – Ministru Transporte no Komunikasaun (MTK), José Agostinho da Silva, hateten Timor-Leste presiza prepara kondisaun ba atividade aviasaun, hanesan charter no regular fly hafoin Royal Bhutan Airlines bele halo operasaun rute Dili-Singapura.
“La’ós fó lisensa ka lae, maibé ita tenke prepara kondisaun aviasaun nian iha Timor-Leste, ida ne’e iha dalan rua maka ida charter, rua maka regular fly”, afirma ministru ba jornalista sira hafoin enkontru Konsellu Ministru iha Palásiu Governu, ohin.
“Se hakarak charter aviaun, ne’e kualkér tipu aviaun bele mai no autoridade aviasaun sivíl bele prosesa prosedimentu sira atu aviaun sira bele mai iha ita nian rai hodi halo kedan operasaun, maibé prosesu sira ne’e la’ós fásil hanesan ne’e”, dehan nia.
Kuandu aviaun ne’e laiha ema ida atu charter (vou ne’ebé halo la’ós ho oráriu normál) no tenke hili ba regular fly (semo regulá), entaun dalan maka tenke liu husi akordu serbisu ho nasaun sira.
Tanba ne’e, la’ós husi Ministériu Transporte no Komunikasaun maka seidauk fó lisensa ba Royal Bhutan Airlines, maibé aviaun ida atu halo operasaun iha Timor-Leste tenke prosede ba regulamentu rua, kuandu kumpre ona maka foin halo atividade semo.
Royal Bhutan Airlines nu’udar aviaun husi Singapura ne’ebé atu hetan legalidade husi Governu Timor-Leste liuhosi Ministériu Transporte no Komunikasaun hafoin halo operasaun rute Dili-Singapura.
Jornalista : Natalino Costa
Editora : Maria Auxiliadora
