DILI, 10 outubru 2019 (TATOLI) – Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, ohin, reprezenta Governu hodi halo inaugurasaun ba sentru komersiál Golgota. Iha okaziaun ne’e ministru husu ba timoroan sira hotu atu koopera ho investidór internasionál ne’ebé halo investimentu iha país ne’e.
“Husu ba joven timoroan sira atu koopera ho investidór atu nune’e bele dudu prosesu dezenvolvimentu ekonomia Timor-Leste bá oin di’ak liu”, dehan nia ba jornalista sira hafoin inaugurasaun iha Komoro, ohin.
Governante ne’e dehan liuhusi investimentu iha sentru komersiál ne’e ema balun iha hanoin oioin atu lakohi koopera, maibé ida ne’e meiu ida Governu atu dudu prosesu ekonomia Timor-Leste nian.
“Ha’u komprende iha negosiante balun lakohi mai iha fatin ne’e tanba folin, maibé ho oportunidade ida ne’e ita ko’alia kona-ba dezenvolvimentu, ema hotu tenke koopera hodi nasaun ne’e la’o bá oin”, dehan Fidelis.
Iha fatin hanesan, eis Prezidente Repúblika José Ramos Horta afirma Golgota mall ne’e kategoria ona ba iha mall modernu ne’ebé kompara karik tuir ona padraun internasionál. Tanba ne’e nia parte sei la dúvida bainhira negosiante Kampung Alor halo negósiu iha fatin ne’e.
Premiadu Nobel Pás ne’e kongratula tebes ba empreza Fu Xin Unipessoal, Lda, ne’ebé esforsu halo investimentu ho kapitál boot hodi ajuda Governu Timor-Leste halo sentru komersiál hodi re aloka vendedór sira iha Kampung Alor ne’e, hanoin ida di’ak no bá oin bele kontinua nune’e bele aloka maluk komersiante sira halo negósiu iha dalan hodi bele hetan fatin dignu.
Nune’e mós Konsultora ba Golgota Mall, Mimi Chungue hateten mall ne’e rasik investe ho kapitál millaun $3,5 ho kuartu hamutuk 122 ne’ebé kuartu ida uza ba fatin reza ka muxola.
Nia dehan na’in ba empreza Fu Xin Unipessoal Lda, Chen Guo Qing, mós kompromete ona planu ba longu prazu hodi halo investimentu adekuadu no kualifikadu ba futuru.
“Ami iha planu hodi ajuda Governu Timor-Leste halo investimentu iha área potensiál sira tanba daudaun ne’e ami iha ona investimentu primeiru no ba ida segundu bá oin, ami sei iha planu ne’ebé di’ak dezenvolve setór potensiál seluk”, Mimi Chungue relata.
Konsultora ba empreza xineza ne’e haktuir ho investimentu ne’ebé maka daudaun empreza ne’e halo, otimista katak sei fó serbisu direta no indireta ba timoroan sira hamutuk 2000.
Tanba ne’e empreza iha kompromisu atu dezenvolve área turizmu iha Timor-Leste ba aban-bainrua nian hodi bele diversifika ekonomia nasaun nian.
Notísia relevante : Rendimentu Gólgota Mall Kada Fulan $61,000,00.
Jornalista : Natalino Costa
Editora : Maria Auxiliadora
