DILI, 09 outubru 2019 (TATOLI) – Sekretáriu Estadu Protesaun Sivíl, Alexandrino de Araújo, informa tuir dadus atuál dizastre naturál ne’ebé mak akontese iha munisípiu Ermera, Liquiçá, Aileu no Bobonaro hamutuk 572, maibé Governu foin fó apoiu emerjénsia balun tanba sei haree bazeia ba levantamentu dadus.
“Iha dadus sira ne’e ita fó ona apoiu emerjénsia hamutuk 199 no agora sei kontinua halo levantamentu dadus. Ita prontu atu fó apoiu emerjénsia no iha kontatu direta ho autoridade munisípiu sira tanba ne’e dadus mai duni husi munisípiu sira”, tenik governante ne’e iha Palásiu Governu, kuarta ne’e.
Maski nune’e, nia dehan parte ministériu sei verifika fali dadus atu bele fó apoiu tan.
“Apoiu ne’ebé ita fó iha tipu rua maka hanesan emerjénsia no rekuperasaun (konstrusaun). Tipu emerjénsia mak hanesan hahan, lona no sasan dapur sira, enkuantu apoiu seluk mak sei halo levantamentu dadus tanba ida-ne’e atu haree hodi hadia fila-fali uma ida-ne’ebé maka kama’an no ida a’at totál”, nia akresenta.
Tuir nia, apoiu seidauk hotu tanba faze dahuluk bazeia ba dadus ne’ebé tama no faze daruak maka sei kontinua ho dadus sira ne’ebé iha.
Alexandrino de Araújo salienta, munisípiu Ermera iha 200 resin mak presiza apoiu maibé faze dahuluk foin fó ba 141 no sei kontinua fó apoiu nafatin tuir dadus ne’ebé mak tama.
Nia dehan, sei iha koordenasaun entre Ministériu Administrasaun Estatál, Ministériu Interiór, Ministériu Solidaridade Sosiál no Sekretaria Estadu Protesaun Sivíl.
“Agora dadauk apoiu emerjénsia mai hotu husi Cruz Vermelha Timor-Leste nomós Mercy Corps. Ita sei kontinua koordensaun atu ba-oin ministériu relevante sira bele iha atensaun ba área sira-nian. Hanesan agora daudaun ahi-haan ho eskala boot, presiza moos husi Ministériu Saúde tanba balu afeta mós ba saúde”, nia subliña.
Jornalista: Julia Chatarina
Editór: Xisto Freitas
