DILI, 10 outubru 2019 (TATOLI)-Ekipa Klube Futeból Kaycas, Ideia Urafu, Suku Holarua, Postu Administrativu Same, Munisípiu Manufahi, husu ba Komisaun Organizadora (KO) atu kumpre regra ba realizasaun primeiru jogu Copa Manufahi 2019.
Portavós Klube Kaycas, Jonas de Fátima Tilman, deklara, sira preokupa no lamenta ho atividade jogu futeból Copa Manufahi ne’ebé realiza ona iha loron 6 outubru 2019, entre Klube FC Caycas Vs FC Tuhalao, iha Estádiu Same- Letefoho iha oras 16:30 too 17:00 kalan, konsidera mosu erru boot ne’ebé hamosu husi Presidente Meza ba Copa Manufahi nian.
Jonas kritika hodi lamenta Prezidente Meza ba Copa Manufahi, la imparsiál no independente inklui hala’o servisu la transparénsia hodi inkilina fali ba klube seluk. Tanba de’it mosu problema interna ikus mai Komisaun Organizadora influensia árbitru balun hodi hamosu manipulasaun iha jogu hola bola falta, ikus mai árbitru foti desizaun ba Klube Tuhalao marka penalti hodi jogadór suta golu ida hodi lori klube rua remata jogu ho empata 1-1.
“Ami husu Klube Futeból Kaycas lamenta tebes ho atitude Komisaun Organizadora ba jogu Copa Manufahi ne’ebé la hatudu sira nia profisionalizmu iha área desportu hodi hamosu diskriminasaun ba klube ne’ebé partisipa iha copa ne’e. Ami mós lamenta tebes ho regulamentu balun ne’ebé implementa husi Komisaun Organizadora,” dehan Jonas de Fátima Tilman liu husi komunikadu imprensa ne’ebé Ajénsia TATOLI asesu, ohin.
Relasiona ho problema hirak ne’e, Jonas lori naran Klube Kaycas husu ba Prezidente Autoridade Munisípiu Manufahi, Arantes Isaac Sarmento, atu toma atensaun hodi hadi’a fallansu ne’ebé hamosu husi Komisaun Organizadora labele repete tan.
“Ami husu karik iha loron ruma mai loke jogu ou copa ruma iha Munisípiu Manufahi tenke tau ema di’ak ne’ebé iha kapasidade no koñesimentu di’ak kona-ba área desportu futeból nian,” nia alerta.
Portavós Klube Kaycas ne’e mós husu ba Governu Timor-Leste liu husi Sekretáriu Estadu Juventude Desportu (SEJD), Nelio Isaac Sarmento, atu haree problema sira ne’e, karik ba futuru atu ajuda orsamentu ba setór desportu iha Manufahi nian hodi realiza jogu ruma presiza kria koordenasaun di’ak ho Prezidente Autoridade Munisípiu Manufahi bele forma ka hili ema ka Komisaun Organizadora ne’ebé independente ka imparsiál iha fuan boot no koñesimentu kle’an kona-ba jogu hodi labele hamosu tan problema hanesan iha futuru hodi kontribui ba dezenvolvimentu desportu iha Manufahi.
Lamentasaun ne’e, Klube Kayacas aprezenta mós Prezidente Konsellu Nasionál Juventude Timor-Leste (CNJTL), Maria Dadi Soares Magno atu tau konsiderasaun hodi bele fó ideia furak ba komisaun atu labele hamosu tan fallansu iha futuru.
“Ami husu ba Prezidente CNJTL atu tau atensaun ba hahalok husi elementu Prezidente CNJTL Munisípiu Manufahi nian ne’ebé seidauk hatene nia aan didi’ak hodi ezerse nia funsaun hanesan prezidente juventude no joven Manufahi nia oan,” nia apela.
Ba komisaun organizadora, alerta dala ida tan, atu kuidadu hodi hamosu fallansu iha futuru, atu ne’e jogu Copa Manufahi ne’ebé sei kontinua joga bele realiza too remata ho dame.
Ikus liu, sira rekomenda atu Komisaun Organizadora atu monta ekipa liña no arbitrajen ne’ebé profisionál atu kontrola jogu klube hotu-hotu ho imparsiál.
Klube ne’e hato’o agradese mós ba Patrosinadora Kompañia Internasionál Austrália,Timor Resources hamutuk ho Prezidente Autoridade Munisípiu Manufahi ne’ebé fó apoiu másimu ba jogu ne’ebé partisipa direita husi klube 18 ne’ebé mai husi Postu Alas, Fatuberliu, Same no Turiskai.
Jornalista : Eugénio Pereira
Editór : Francisco Simões
