DILI, 10 outubru 2019 (TATOLI)-Estudante Eskola Sekundária Herois da Pátria Becora ida ho naran Guilherme Sarmento hetan oportunidade liuhusi kompetisaun no agora daudaun kontinua hela ninia estudu aviadór ka pilotu iha Filipina.
Estudante ne’e partisipa kompetisaun iha área Kímika iha tinan akadémiku 2016 hamutuk ho kandidatu rihun rua resin, nia hetan previlejiu no agora halao hela estudu iha rai li´ur
Diretór da Eskola Herois da Pátria Becora, José Diaz Guterres hateten durante ne’e imajen eskola ne’e nian iha públiku ninia matan katak Herois da Patria halibur estudante ne’ebé abandonadu, laiha diploma maibé iha realidade estudante sira kuandu akaba husi eskola ne’e hatudu sira-nia kualidade.
“Ha’u-nia estudante ne’e hatudu kualidade. Nia estudante ida iha poténsia bo’ot iha abilidade durante eskola tan ne’e agora tinan tolu ona kontinua hela ninia estudu iha Filipina,” hateten Diretór José Diaz Guterres ba Ajénsia TATOLI iha eskola Herois da Patria Becora, kinta (10/10/2019).
Guilherme nu´udar estudante finalista siénsia naturál 2016 husi eskola Herois da Pátria ne’ebé ho fiar aan partisipa iha kompetisaun hodi hetan bolsu estudu. “Rezultadu ne’e hatudu nia merese duni,” friza diretór eskola ne´e.
Diretór ne’e dehan tan katak maske ba eskola iha li´ur kuandu fila mai pasa férias, Guilherme sempre mai vizita ninia eskola. “Ha’u apresia ninia konsiderasaun ba eskola ida ne’e. Nia sempre mai husu nafatin opiniaun no apoiu morál husi eskola, ha’u apresia nia,” haktuir Manorin na´in Herois da Pátria ne´e
Jornalista : Tomé Amado
Editór :Rafy Belo
