DILI, 10 outubru 2019 (TATOLI) – Maski desde lejislatura dahuluk to’o oras ne’e Parlamentu Nasionál (PN) aprova ona lei kuaze 200, maibé parte balun konsidera fiskalizasaun ba ezekusaun lei hirak ne’e ladun másimu.
Prezidente Parlamentu Nasionál (PPN), Arão Noé de Jesus da Costa Amaral, hateten normalmente implementasaun ba lei bazeia ba asaun tanba ne’e fiskalizasaun ne’ebé PN halo tenke haree ba kestaun hirak ne’e.
Notísia Relevante: CEPAD Konsidera Fiskalizasaun PN ba Implementasaun Lei Ladun Másimu
PPN ko’alia asuntu ne’e, relasiona ho deklarasaun Diretór Sentru Estadu ba Pás no Dezenvolvimentu (CEPAD-sigla portugés), João Boavida, ne’ebé mak observa katak durante ne’e fiskalizasaun PN ba ezekusaun lei ladun másimu.
“Agora ezekusaun lei sira ne’e barak mak la’o ho di’ak no iha balun maka ladún la’o tanba implementasaun lei sira ne’e bazeia ba ninia asaun ruma hafoin ita bele aplika”, nia dehan iha resintu PN, kinta ne’e.
Tuir Deputadu Bankada CNRT ne’e, enkuantu lei ne’e la’o tuir hela regra sira maka sei laiha problema.
“Hanesan Lei Atividade Petrolífera ne’ebé aprova ona iha tinan 2005 maibé durante ne’e ema nunka temi lei ida-ne’e, to’o iha 2018 ita komesa hanoin halo alterasaun entaun komesa ema ko’alia lei refere”, nia akresenta.
Nune’e mós Kona-ba Lei Rejiaun Administrativu Espesiál Oé-cusse Ambeno (RAEOA) ne’ebé aprova iha 2014 maibé iha tinan 2019 konsege sofre alterasaun iha artigu balun atu korresponde ho situasaun atuál.
Enkuantu Lei Rai-nian aprova ona iha 2017 maibé agora seidauk iha faze implementasaun tanba presiza ajusta ho mudansa tempu.
“Ha’u hanoin públiku kestiona buat sira ne’e, oinsá seriedade ba implementasaun lei sira ne’ebé maka Parlamentu Nasionál aprova, maibé ita labele haluha katak lei sira presiza regula ho lei komplementár ka dekretu lei. Entaun kabe ba órgaun kompetente ne’ebé lei fó para atu bele halo preparasaun lejizlasaun komplementár seluk para implementa lei sira ne’e ho di’ak”, Arão Noé subliña.
Tuir nia, lei labele haree jerál de’it, maibé tenke haree espesífiku kada artigu ne’ebé ejize tenke implementa fali ho dekretu lei ka lei komplementár seluk.
Jornalista : Evaristo Soares Martins
Editór: Xisto Freitas
