DILI, 11 outubru 2019 (TATOLI) – Diretór Nasionál Kontabilidade Regulasaun Finanseira (DNCRF, sigla portugés) Ministériu Finansa (MF), Erneseto da Conceição Silva, hatete monitorizasaun ne’ebé halo identifika katak kauza husi ajénsia autónoma no munisípiu sira la konsege prepara relatóriu rekonsiliasaun bankária, orsamentu ezekusaun trimestrál no fluksu kaixa tanba falta rekursu ne’ebé adekuadu no halo mudansa ba responsabilidade serbisu.
“Ami identifika katak kauza tanba saida maka sira lakonsege prepara relatóriu rekonsiliasaun bankária, relatóriu orsamentu ezekusaun trimestrál, no relatóriu fluksu de kaixa, primeiru, tanba falta rekursu ne’ebé adekuadu, segundu, maka sempre halo mudansa ba responsabilidade servisu iha munisípiu no ajénsia sira tanba pesóal balu simu tiha ona formasaun ikus mai muda bá fatin seluk laiha transferénsia koñesimentu ba servisu ne’ebé hetan tiha ona treinamentu no hato’o pedidu mai diresaun tezouru hodi fó nafatin formasaun”, relata Erneseto da Conceição Silva iha serimónia enserramentu ba formasaun nasionál kontabilidade no relatóriu finanseiru públiku iha salaun MF, Aitarak-Laran, ohin.
Erneseto afirma, monitorizasaun no evaluasaun hatudu katak maioria ofisiál finansa munisípiu no ajénsia autónoma sira seidauk independentemente prepara servisu ne’ebé relasiona ho kontabilidade tanba ne’e maka iha 2019 halo fali treinamentu ho inovasaun, métodu no modelu foun ne’ebé hala’o dahuluk iha munisípiu 12 iha maiu durante fulan ida, partisipa hosi partisipante 36 no hosi rezultadu ne’e munisípiu sira bele halo rasik sira-nia relatóriu. Hanesan komponente ida ne’ebé sei kontribui ba relatóriu finanseiru anuál ne’ebé kada ajénsia no munisípiu sira sei prepara rasik.
DNCRF hala’o ona treinamentu lubuk ida ba ajénsia autónoma dezde 2016 bainhira Konsellu Ministru aprova sai hanesan ajénsia, no iha 2017 realiza mós treinamentu ba munisípiu sira.
Matéria durante formasaun iha tolu hanesan relatóriu rekonsiliasaun bankária, relatóriu ezekusaun orsamentu trimestrál, no mós relatóriu fluxu kaixa.
“Tanba ajénsia autónoma no munisípiu sira hetan ona treinamentu ida ne’e maka hanoin katak ezekusaun iha 2020, tezouru tau iha sirkulár ezekusaun para ajénsia sira submete relatóriu tolu ne’e hodi hetan osan transferénsia orsamentu trimestrál nian. Nune’e bele ajuda tezouru hodi halo jestaun ba kaixa Governu tomak nian. Tanba durante ne’e, ami lahetan informasaun adekuada relasiona ajénsia sira fluksu de kaixa, projesaun ba ezekusaun kada fulan, ikus mai difikulta tezouru para bele halo planu de kaixa ida akuradu”, katak Ernesto.
Iha sesaun enserramentu ne’e fahe mós sertifikadu ba formadór no mós formandu sira hosi ajénsia autónoma no munisípiu sira.
Notísia relevante : MF Espera Ajénsia Autónoma Sira Bele Prepara Relatóriu Orsamentál ho Di’ak
Jornalista : Antónia Gusmão
Editora : Maria Auxiliadora
