DILI, 10 outubru 2019 (TATOLI)—Eskola Herois da Pátria nu’udar eskola rezistente ne’ebé hetan kontribuisaun husi Eis-Prezidente da Repúblika Xanana Gusmão iha 2002 bainhira juventude resistente sira lakon esperansa ba sira-nia futuru.
Molok atu fó naran no hanaran sai Eskola Herois da Pátria, eskola ne’e koñesidu ho naran Eskola Hun Naroman ne’ebé utiliza iha Eis-Edifísiu Badan Latihan Keterampilan (BLK) Becora. Ikus mai eskola ne’e troka nia naran tanba mosu dezentendimentu. Haree ba lala’ok istória eskola ne’e nian ne’ebé interesante loos entaun Ajénsia Tatoli hakarak Tatoli eskola ne’e nia perfil.
Naran Eskola: Ensinu Sekundária Geral Herois da Pátria
Lokaliza: Iha Suku Becora, Postu Administrativu Cristo Rei, Munisípiu Dili.
Fundadór: José Dias Guterres.
Funda/Harii: Iha 18 outubru 2002.
Diretór Eskola: José Diaz Guterres.
Totál Profesór/a: Hamutuk ema na’in 13.
Totál Estudante: Hamutuk ema na’in 328.
Total Sala de Aulas: Hamutuk 15.
Biblioteka no Laboratóriu: Seidauk iha.
Livru Sira hetan apoiu husi Ministériu Edukasaun, Juventude e Desportu.
Vizaun no Misaun: Atu akumula estudante foinsa’e sira ne’ebé desistente atu hetan fali fatin ida adekuadu hodi lori sira ba futuru ida di’ak liu.
Objetivu: Atu valoriza estudante dezistente sira liu husi eskola ida formál atu bele hetan fali diploma hodi nune’e sira bele kontinua hatutan estudu ba oin hodi nune’e bele kompete iha merkadu traballu.
Atividade Ekstrakurikulár: Iha atividade Konsellu Estudante ne’ebé kada semana organiza limpeza halo vizita ba Xanana Reading Room iha Lecidere. Inklui mós interkambiu ba munisípiu.
Difikuldade: Iha sala de aulas 6 mak família balun okupa hela dezde 1998 to’o agora. Ida ne’e mak sai obstakulu hodi trava hela prosesu konstrusaun eskola Herois da Pátria nian.
Eskola Ensinu Sekundária Geral Herois da Pátria Becora, hetan ona akreditasaun husi Governu tanba ne’e kada tinan sempre hetan apoiu merenda eskolár no konsensaun eskolár, inklui livru sira sufisiente ona bele responde materia iha kurrikulu sira.
Notísia relevante:Perfil Eskola Ensinu Sekundária Iha Dili: ESG Sagrado Coração de Jesus (Sacorjes) Becora (IV)
Jornalista : Tomé Amado
Editór : Rafy Belo
