LAUTEM, 10 outubru 2019 (TATOLI) – Kooperativa Fiar Ida Neon Ida (FINI) ne’ebé lokaliza iha Irigasaun Savarika, Suku Fuiluro, Postu Administrativu Lospalos, Munisípiu Lautem, harii produsaun sabaun ho objetivu atu kombate moras kulit.
Koordenadór kooperativa FINI, Carolino dos Santos, hateten nia parte iha hanoin atu bele dezenvolve fabrika sabaun atu hatan ba demanda nasionál, maibé presiza mákina filtrajen hodi produz sabaun morin, kreme no laboratóriu atu sukat kualidade sabaun iha merkadória.
Nia haktuir, hafoin produz sabaun tonelada 6, to’o ohin loron seidauk hetan keixa ruma husi konsumedór ne’ebé hetan efeitu negativu husi utilizasaun sabaun.
“Prezensa sabaun FINI tulun ona atu hamenus moras kulit iha Lautem”, hateten Carolino bainhira Prezidente Repúblika (PR), Francisco Guterres ‘Lú Olo’ vizita fatin produsaun, kinta ne’e.
Nia dehan, rezultadu husi produsaun sabaun ne’e konsege fa’an ona iha Lospalos, otél no supermerkadu iha Dili laran.
Iha fulan-setembru 2019, kooperativa konsege fa’an sabaun hamutuk-4000 ba super-merkadu Leader, Lita Store, Otél Beach Side, Otél Arbiru no Otél Dili.
Carolino dehan tan, Kooperativa FINI harii iha 2009 ho ninia membru hamutuk na’in-40, hafoin organizasaun naun-governamental Friends for Medical-care in East Timor (AFMET) husi Japaun la kontinua ninia projetu iha Lospalos.
Nune’e, iha tinan 2013, FINI hetan apoiu misturadór husi Governu atu bele hasa’e kapasidade produsaun, no Kapasidade misturadór ne’e kada oras-rua bele produz sabaun hamutuk-600.
Tuir Koordenadór mikro empreza ne’e, maske iha misturadór ona maibé produsaun sabaun depende ba demanda husi merkadu.
Kona-ba matéria prima ne’ebé uza ba produsaun sabaun maka mina-nu kahur ho caustic soda.
Hafoin rona tiha esplikasaun husi koordenador FINI, Xefe Estadu enkoraja koordenadór Kooperativa ne’e atu kontinua halo produsaun sabaun maski hasoru difikuldade oioin, nune’e bele fó rendimentu ba ninia membru sira no kontribui ba saúde públika.
PR Lú Olo mós fó apoiu ba inisiativa kooperativa ne’e no sei halo koordenasaun ho Governu oinsá bele hasa’e liután produtividade iha rai-laran.
Jornalista: Cipriano Colo
Editór: Xisto Freitas
