DILI, 12 outubru 2019 (TATOLI)—Eis Sekretáriu Ezekutivu Liga Futeból Amadora no eis futebolista timoroan, Sérgio Hornai konsidera Liga Futeból Amadora (LFA) komesa iha ona progresu hosi loron ba loron.
Nia esplika, LFA iha progresu tanba parte ezekutivu serbisu ho di’ak inklui klube sira mós organiza-aan di’ak tebes.
“Hahú hosi Liga Futeból Amadora ne’e estabelese, loron ba loron iha progresu ne’ebé mak boot tebes iha parte organizasaun Liga Futeból Amadora ne’e rasik iha parte ezekutivu ninian no mós parte klube sira ne’ebé organiza sira-nia aan no haree ba Liga ida-ne’e oinsá mak sai prátika desportiva ida-ne’ebé mak iha nia sustentabilidade,” tenik Sérgio ba Agência Tatoli iha Estádiu Munisipál Dili, sábadu ne’e.
Nia hatutan, maski atividade ne’e la’o iha ámbitu klube barak sei iha difikuldade iha área rekursu, infraestrutura no orsamentu maibé sira la lakon kbiit. Sira kontinua pasiénsia hodi dezenvolve futeból iha nasaun ne’e hosi Primeira Divizaun no Segunda Divizaun.
Atu lori LFA ba oin no sai Liga Profisionál, Sérgio informa, klube sira tenke organiza-aan halo didi’ak nune’e bele iha jestaun ida di’ak no estatuta rasik.
“Klube sira mós tenke iha sira-nia rekursu finanseira no rekursu kuadru pesoál nune’e bele organiza sira-nia jestaun iha klube ne’e rasik no mós oinsá mak bele asegura jogadór sira hodi bele hetan konfiansa ida ba klube ne’e rasik. Entaun, ida-ne’e ita presiza rekursu ida-ne’ebé natoon hodi sustenta en-termu jestaun,” nia fó hanoin.
Jornalista: Hortençio Sanchez
Editór: Xisto Freitas
