DILI, 14 outubru 2019 (TATOLI) – Diretór Operasaun Autoridade Inspesaun no Fiskalizasaun ba Atividade Ekonómika no Sanitária (AIFAESA), Gabriel da Costa, hateten AIFAESA simu informasaun husi intelijénsia Polisia Servisu Investigasaun Kriminál katak iha loja Lucky Market Audian iha na’an manu kontentór ida ne’ebé deskonfia liu ona prazu.
“Informasaun to’o mai iha AIFAESA, ami tun kedan bá haree loja ne’e no ami konsege segel (sela) duni kontentór ida ne’ebé deskonfia nakonu ho na’an manu ne’ebé liu prazu”, dehan Gabriel da Costa ba Ajénsia Tatoli iha nia knaar fatin Matadouru, ohin.
Nia dehan : “Ami la hatane na’an manu ne’e tonelada hira tanba ohin sei kontentór, ami segel hela tau hela iha loja tanba AIFAESA rasik laiha armazein ne’ebé atu tau sasán sira ne’e”.
Na’an manu importa husi Xina, tanba ne’e, loja na’in sei presta deklarasaun iha AIFAESA.
Gabriel afirma kuandu identifika katak na’an sira ne’e liu prazu duni entaun AIFAESA sei foti medida hodi aplika multa ba empreza ne’e rasik.
Tanba tuir dekretu lei 23/2008, 5 agostu, sasán sira hanesan ne’e bele multa husi rihun ida to’ o rihun sanulu.
Kuandu prosesu inkéritu AIFAESA nian ba loja na’in maka hetan evidénsia hodi hatudu indikasaun ba iha krime husi AIFAESA sei entrega ba polísia hodi halo prosesu tuirmai.
Koordenadór AIFAESA Abílio Oliveira Sereno hatutan kontentór ne’ebé AIFAESA halo selajen ona la presiza halo teste laboratóriu.
Nia dehan ekipa AIFAESA rasik tun bá hodi halo inspesaun iha loja Lucky Market Audian ne’ebé hetan kontentór ida ne’ebé empreza na’in mós rekoñese katak na’an sira balun dodok ona.
“Kuandu na’in rekoñese entaun prontu ami segel no husu sira labele book tanba na’an nia kondisaun la di’ak, labele fa’an”, dehan Abílio.
Koordenadór ne’e hateten kuandu identifika maka loja Lucky Market hetan irregularidade ruma, AIFAESA sei fó sansaun tuir regulamentu ne’ebé iha.
Maibé kona-ba sansaun ne’e tuir informasaun iha ona vítima ba konsome na’an manu ka ayam potong husi loja ne’e.
Abílio Oliveira Sereno salienta kontentór ida ho na’an manu ne’e husi AIFAESA sei fó ba Sekretáriu Estadu Ambiente atu fó han lafahek, enkuantu la konsege foti maka AIFAESA sei lori bá hakoi ka halo destruisaun iha Tibar.
Jornalista : Natalino Costa
Editora : Maria Auxiliadora
