DIL, 14 outubru 2019 (TATOLI) – Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, iha Esperansa boot ba manán-na’in sira ne’ebé daudaun ne’e tuir kompetisaun Planu Negósiu Inovativu (PNI) 2019 hodi transforma sira-nia negósiu sai realidade.
“Ha’u-nia espetativa maka planu ida ne’e sei susesu, sira ne’ebé manán ha’u iha esperansa atu sira bele kontinua ho sira-nia planu ne’e no nakfilak sai realidade negósiu ne’ebé forte liután iha futuru”, dehan MKAE bainhira loke audisaun ba kompetisaun ne’e iha Timor plaza, ohin.
Atuál Ministru Reforma Lejizlativa no Asuntu Parlamentár (MRLAP) ne’e hatutan, importante liu atu hatene no kapasita liután, maske iha vontade maka’as más presiza organiza empreza sira, hadi’a negósiu sira-nia kualidade no preparasaun rasik atu aproveita oportunidade hotu no responsabilidade, liuliu ida ne’ebé maka kontribui hadi’a kapasidade no tenke kontinua atentu ba oportunidade sira ne’ebé merkadu fó.
Atu asesu ba kréditu fásil liu maka, MKAE interinu ne’e dehan, daudaun ne’e Banku Sentrál Timor-Leste (BCTL, sigla portugés) fó ona eskema garantia kréditu maski nune’e hanesan programa pilotu ida, no BNCTL de’it mak partisipa.
“BNCTL ne’e maka hanesan banku ne’ebé na’in mak Governu, tanba ne’e Governu bele hatuur prioridade hirak ne’e liuhosi Konsellu Administrasaun BSTL haree oinsá maka bele kontribui ba fasilita asesu kréditu nian”, dehan Governante ne’e.
Lee mós : MKAE Orgullu ho Kriasaun Eskema Garantia Kréditu
Fidelis enkoraja emprezáriu timoroan la sira labele para aprende, kontinua kapasita aan hodi kompete iha nivel mundiál.
“Setór privadu Timor-Leste sei presiza akompañamentu ida ne’ebé besik hosi Governu para bele iha liras hodi semo rasik”, dehan Fidelis.
Entretantu iha audisaun finál ba kompetisaun ne’e loke mós video badak hosi kompetidór sira ba partisipante sira.
Notísia Relevante : Kompetidór Na’in-10 Kompete iha Planu Negósiu Inovativu ba Daneen
Jornalista : Antónia Gusmão
Editora : Maria Auxiliadora
