iklan

HEADLINE, POLÍTIKA

PPN Espera Komisaun A Bele Aselera Diskusaun LAK

PPN Espera Komisaun A Bele Aselera Diskusaun LAK

Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 14 setembru 2019 (TATOLI) – Prezidente Parlamentu Nasionál (PPN), Arão Noé de Jesus da Costa Amaral, espera Komisaun A ne’ebé trata asuntu Justisa no Konstitusionál bele aselera diskusaun Projetu Lei Antí-Korrupsaun (LAK).

“Vontade polítika ne’e hotu-hotu nian. Ami hein katak Komisaun A bele aselera prosesu ne’e atu bele konklui rápido posível tanba ita iha lei sira seluk ne’ebé hein hela”, tenik PPN ba jornalista sira iha Parlamentu Nasionál (PN), segunda ne’e.

Nia hatutan: “Agora kabe ba sira hotu-hotu ninia ajenda atu bele aserta lalais. Ha’u hakarak aselera asuntu ne’e maibé tuir informasaun katak asuntu balun presiza aumenta tan hanesan deklarasaun bens no prevensaun atu inklui hotu iha lei ne’e”.

Notísia Relevante: Komisaun A Hakarak Tetu Implementa Deklarasaun Riku-Soin iha LAK

Tuir informasaun ne’ebé Arão Noé asesu hosi Komisaun A, katak agora dadauk komisaun ne’e sé armoniza hotu Projetu LAK ne’ebé iha artigu 100 resin husi inisiál 30 resin artigu.

Nia esplika, bainhira lei ne’e aprova iha futuru instituisaun hirak ne’ebé ezekuta lei ne’e tenke iha formasaun, liliu kbiit Komisaun Antí-Korrupsaun (KAK) nian.

“Presiza formasaun maka’as ba iha área judisiária la’ós de’it Komisaun Antí-Korrupsaun, maibé mós ba Polísia Investigasaun Kriminál ida”, nia akresenta.

Notísia Relevante: Prezidente Komisaun A Rekoñese Difísil Finaliza LAK Tinan ne’e

PPN subliña, kompoziaun atu halo justisa ida di’ak depende ba iha Prokuradór, Defensór Públiku no Tribunál.

“Entaun kompoziaun ida ne’e tenke fó atensaun hanesan formasaun tenke kontinua no lejizlasaun sira tenke iha dominasaun di’ak atu nune’e prosesu judisiál la’o di’ak”, hateten Arão Noé.

Komisaun A iha membru na’in-11, ne’ebé kompostu husi Bankada Governu na’in-neen no Bankada Opozisaun na’in-lima.

Jornalista: Evaristo Soares Martins

Editór: Xisto Freitas

iklan
iklan

Leave a Reply

iklan
error: Content is protected !!