OEKUSI, 14 outubru 2019 (TATOLI) – Estudante hamutuk 2.239 iha Rejiaun Administrativa Espesiál Oekusi Ambenu (RAEOA), partisipa ezame nasionál, ohin.
Diretór Edukasaun Rejionál RAEOA, Daniel Mauno, iha ninia rezidénsia Oesono Suku Costa, sub Rejiaun Pante Makasar, ba Tatoli esplika, númeru ne’e bazea ba lista ne’ebé parte Edukasaun Rejionál haruka ba Ministériu Edukasaun nasionál.
Númeru ne’e mós mai husi ensinu báziku hamutuk 1.438, ensinu sekundáriu, kompostu husi ensinu sekundáriu jerál tolu, eskola téknika vokasionál rua, hamutuk 801.
Daniel Mauno hateten, preparasaun ezame Nasionál bazea ba manuál ne’ebé Ministériu Edukasaun prodús. Nune’e, diretór rejionál tenke hala’o enkontru informátiku ho diretór eskola sira, oinsá informa kona-ba manuál ne’e rasik.
“Ohin hanesan loron dahuluk ezame nasionál ba Timor tomak, no iha RAEOA, la’o di’ak tebtebes”, katak Mauno.
Diretór ne’e observa asaun estudante sira iha ezame loron dahuluk, balun maski seidauk to’o oras determinadu, maibé sai uluk ona, ho esperansa sinál pozitivu, katak, matéria ezame nasionál tinan ne’e la difísil.
Daniel husik hela mensajen ba estudante sira, atu prepara didiak, labele ansi, tenke lee didi’ak, kompriende didi’ak, prienxe didi’ak, nune’e bele hetan rezultadu di’ak iha ezame tinan ne’e.
Entretantu, ezame nasionál hahú ohin to’o kuarta 16 outubru, hafoin iha loron 17 kontinua ezame lokál to’o loron 18 fulan ne’e.
Tuir livru 3-C Orsamentu Jerál Estadu (OJE) 2019 RAEOA-ZEESM haktuir 2018 alunu eskola públiku hosi pre-primária to’o ensinu tékniku hamutuk 22,541 ho profesór permanente 423 no kontratadu 298.
Estudante eskola Katólika ensinu báziku to’o ensinu tékniku hamutuk 2,534 ho profesór permanente 64 no kontratadu 44.
Meiu sira iha eskola públiku no privadu mak sala 710 hosi totál eskola 94 ho maknorin permanente 487 no kontratadu 344. Totál alunu 25,075.
Jornalista: Cipriano Colo
Editora: Rita Almeida
