DILI, 16 Outubru 2019 (TATOLI)-Ministru Negósiu Estranjeiru no Kooperasaun (MNEK), Dionísio da Costa Babo Soares, hateten katak tinan oin, ekipa delegasaun “Fact-Finding Mission” ASEAN (Organizasaun Sudeste Aziátiku-sigla inglés) sei halo avaliasaun ba prontidaun Timor-Leste (TL) hodi adere iha organizasaun aziátiaka ne´e iha área kultura no ekonomia, hafoin pronunsia rezultadu.
“Agora ita labele ansi hetan rezultadu tanba ema sei ko’alia, ema sei halo investigasaun tiha hotu, sei halo avaliasaun tiha hotu, depois mak ema foin fó rezultadu, ne’ebé ita hein lai to’o tinan oin,” hateten Ministru Dionísio Babo Soares ba jornalista sira hafoin partisipa iha reuniaun Konsellu-Ministru, iha Palásiu Governu, ohin.
Governante ne´e relembra katak ekipa delegasaun “Fact-Finding Mission” ASEAN ne´ebé mai ona antes ne´e mak liga ba área polítika, seguransa no defeza. “Sei mai fali ekipa ida (kultura no ekonomia”.
Notísia relevante:Ohin, Ekipa Delegasaun ASEAN “Fact-Finding Mission” To’o Ona Iha Timor-Leste
Jornalista : Nelia Fernandes
Editór : Rafy Belo
