DILI, 16 outubru 2019 (TATOLI) – Korporasaun Kréditu (CC, sigla inglés) Papua Nova Giné (PNG) ne’ebé nia ramu iha Timor-Leste konvida setór privadu Nasionál hodi diskute hamutuk produtu importante tolu.
Country Head Credit Corporation Timor-Leste, Chris Durman, hatete produtu prinsipál tolu maka hanesan empreza nia empresta, finansiamentu ba empresta, no mós depózitu ne’ebé kompañia halo ho banku sira, hanesan mós dalan ida atu apoiu depózitu produtu, aplika servisu no ba interese di’ak.
“Negósiu iha Timór hanesan ami observa, iha kompetisaun tebes iha instituisaun finansa hotu-hotu. Iha ami-nia espetativa ohin nian, iha empreza hamutuk 100 maka partisipa inklui mós membru CCI balu, setór privadu sira, ADB no ajénsia balu”, Chris Durman afirma iha Timor Plaza, ohin.
Nia hatutan, iha aprezentasaun Banku Aziátiku Dezenvolvimentu (ADB, sigla inglés) mós partilla informasaun kona-ba sira-nia partisipasaun iha setór finansa nian.
“Mehi ida ohin ne’e atu ema sira ne’ebé mai hosi kompañia eskluziva bele haree la’ós de’it ba iha banku boot sira iha Timor-Leste, maibé Timor-Leste mós iha banku finansa nian ne’ebé maka úniku no mesak. Tanba ne’e ami mós iha reprezentante hosi Banku Sentrál atu rona no observa ami-nia aprezentasaun”, haktuir Chris Durman.
Country Head Credit Corporation hatutan hanesan setór privadu serbisu hamutuk ho Governu no daudaun ne’e foka liu ba agrikultura no tau konsiderasaun objetivu ba empresta ba iha negósiu komunidade.
“Ami mós garantia katak ami la’o tuir dalan ne’ebé loos hosi setór ne’e no Governu iha Banku Sentrál nia fó empresta, no bele dada fila depózitu sira fila mai Timor-Leste, osan barak ne’ebé kompañia sira rai, bele rai iha Timór”, katak.
Prezidente Kámara Komérsiu Indústria Timor-Leste (CCI-TL), Óscar Lima, salienta antes ne’e delegasaun Credit Corporation PNG hasoru ona ho ekipa CCI-TL hodi ko’alia kona-ba kréditu.
“Ohin, sira konvida filafali mai para atu aprezenta atividade ida kona-ba kréditu tanba sira-nia empreza ne’e kooperasaun kréditu, ne’ebé ami mai hodi rona, tanba iha emprezáriu nasionál sira iha interese atu foti kréditu ne’ebé prezensa iha ne’e hodi rona sira nia aprezentasaun ninia jurus ne’e oinsá ki’ik ka boot, serteza katak jurus ne’e sei diferente ho banku, maibé sira promete sei fó fasilidade oioin”, dehan Oscar Lima.
Óscar Lima espera katak ida ne’e pasu importante ida para bele dudu setór privadu sira, hodi halo programa di’ak no hanoin di’ak hodi oinsá halo investimentu, tanba labele hein de’it ba projetu Estadu nian.
Partisipante sira iha atividade ne’e mai hosi emprezáriu nasionál no internasionál.
Jornalista : Antónia Gusmão
Editora : Maria Auxiliadora
