DILI, 16 outubru 2019 (TATOLI) – Ministru Transporte no Komunikasaun (MTK), José Agostinho da Silva, ohin, relata ona kronolojia kazu suspeitu CdJ ne’ebé segunda (14/10), tuku 14:00 OTL lori motór atu xoke aviaun Siriwijaya Air iha Aeroportu Internasionál Nicolau Lobato, Dili.
“Ha’u relata ona kronolojia kazu ne’e ba Konsellu Ministru, ne’ebé husu ba oin presiza seguransa ida rigorozu iha área aeroportu atu garante ambiente seguru ba pasajeiru sira”, José Agostinho relata iha Palásiu Governu, ohin.
Aléinde ne’e Ministru José Agostinho mós fó ona orientasaun ba Autoridade Navegasaun Aérea Timor-Leste (ANATL,E.P), atu koopera ho Polisia Nasionál Timor-Leste no Seguransa Sivíl atu asegura aeroportu ho rigorozu.
Nia dehan, únika solusaun mak hametin seguransa, hodi hein polítika Governu nia atu ekipa husi liña ministeriál ne’ebé hahú halo planu mestre ba konstrusaun aeroportu ho padraun internasionál.
Hafoin Kazu ne’e, ministru halo ona enkontru ho parte kompetente sira hanesan ANATL, PNTL liuhosi Unidade Patrullamentu Fronteira (UPF), Seguransa Sivíl no kompañia aviasaun sira hanesan Sriwijaya, Citilink no NAM AIR atu kria koordenasaun servisu hodi fó atendimentu di’ak no asegura pasajeiru sira.
“Ba kazu ne’e, ita hein lai prosesu investigasaun ne’ebé hala’o ona husi Polísia Nasionál Servisu Investigasaun Kriminál (PNSIC, sigla portugés) hodi ita hatene motivu”, nia afirma.
Nune’e, nia espera prosesu investigasaun bele finaliza hodi fó informasaun ba públiku, liuliu ba kompañia aviasaun sira. Tanba empreza aviasaun sira mós hakarak asesu rezultadu investigasaun husi PNSIC.
MTK kompromete ba empreza aérea sira no pasajeiru nasionál no internasionál katak Governu liuhosi parte kompetente hotu iha aeroportu hametin ona seguransa.
Entretantu, PNSIC loke ona investigasaun ba suspeitu no nota katak, suspeitu konsege ho motór halai tama to’o pista aeroportu nian.
Momentu ne’ebá aviaun Sriwijaya Air mai husi Bali-Indonézia tula pasajeiru 100 kompostu husi pilotu rua, aeromosa na’in-neen inklui embaixadór estranjeiru na’in-rua.
Aviaun mai tun husi parte oeste atu bá fila iha área leste, no suspeitu ho motór honda la uza xapa matríkula halai hasoru fali aviaun, tanba ne’e autoridade sira aviasaun nian halo kedas medida intervensaun hodi tebe monu suspeitu husi motór leten, nune’e suspeitu la konsege soke aviaun.
Suspeitu CdJ (tinan 45) husi Aldeia Lakoiku, Suku Railaku, Postu Administrativu Railaku, Munisípiu Ermera, iha oan na’in-12, feto sia (9) no mane tolu (3) ne’ebé durante ne’e moris nu’udar agrikultór.
Ho akontesimentu ne’e, rejista ona kazu ho númeru krime NUK0201/19/PNSIK ne’ebé ninia natureza sei kontinua hala’o investigasaun kle’an depois sei aprezenta ba Ministériu Públiku.
Notísia relevante : Suspeitu Uza Motor Atu Soke Aviaun Sriwijaya La’ós Joven
Jornalista : Florencio Miranda Ximenes
Editora : Maria Auxiliadora
