DILI, 17 outubru 2019 (TATOLI) – Diretór Nasionál Konservasaun Natureza, Ministériu Agrikultura no Peska (MAP), João Antalmo, hatete presiza duni atu estabelese armazein iha illa Jaco atu halibur udan-been hodi bailoron naruk balada fuik, liuliu rusa no manu-fuik sira bele hemu.
“Ami planu atu hala’o armazenamentu bee iha illa Jaco hodi halibur udan-been, maibé planu ita halo ida 2019 nia orsamentu la pasa no iha tinan ne’e mós la pasa, maibé ita hakarak salva animál protejidu sira, ita tenke fó prioridade ba ida ne’e”, João Antalmo afirma iha knaar fatin Kaikoli, ohin.
Diretór ne’e friza tuir dezeñu atu konstrui armazein hodi halibur udan-been ne’e ho totál orsamentu rihun $20.
“Ami planu hela atu konstrui rua ne’ebé ho totál orsamentu rihun $40, ne’ebé ami parte tékniku hanoin di’ak liu ita konstrui armazein bee ne’e duké kada tinan ita aloka osan rihun $25 fornese bee ba”, katak.
Planu ne’e, Diretór DNKN adianta parte ezekutivu sira karik konsidera ladún prioridade ne’ebé la pasa, nune’e meiu ida mak muda fali rusa sira ne’e mai rai boot.
“Ami planu atu animál protejidu sira ne’e labele sofre beibeik ba bee no ai-han mak ita tenke muda mai rai boot, maibé presiza mós kria kondisaun ba animál sira ne’e”, nia sujere.
Nia salienta tan : “Ami husu ba Parlamentu Nasionál no Governu liuliu superiór sira atu fó mós prioridade ba planu ne’e atubele fasilita ita-nia animal sira iha illa Jaco bainhira bailoron naruk”.
Tuir dadus DNKN, balada fuik sira ne’ebé moris iha Illa Jaco hanesan rusa hamutuk 80 to’o 100 no manu-fuik, maibé kada tinan nia númeru aumenta.
Notísia relevante : MAP Rejeita Rusa Fuik Mate iha Illa Jaco
Jornalista: Florencio Miranda Ximenes
Editora : Maria Auxiliadora
