ATSABE, 18 outubru 2019 (TATOLI) – Asesór Prinsipál Ministériu Turizmu, Komérsiu no Indústria (MTKI), Jacinto Rigoberto, hanesan mós Atsabe oan lori populasaun suku Batumanu agradese ba Governu tanba konsidera no hili suku ne’e ba programa pilotu Naroman ba Suku.
“Lansamentu ne’e hanesan orgullu no previléjiu ida ba ita tanba ita selesionadu hosi suku hotu iha Atsabe”, hateten asesór prinsipal MTKI iha ambitu lansamentu ba Programa Naroman Suku iha Batumanu, ohin.
Eis governante ne’e hatutan, preokupasaun ho difikuldade ne’ebé suku refere enfrenta Governu Daualuk sei tau proridade.
Tuir Jacinto katak, iha territóriu Timor-Leste eletrisidade atinje ona porsentu 75, maibé iha Munisípiu Ermera rasik ho populasaun barak seidauk asesu ba enerjia elétrika.
Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, hatete programa ida ne’e atu lori Governu hakbesik liu ba povu.
“Hosi programa Naroman ba Suku ne’e hanesan dalan ida atu Governu hakbesik liu ba ninia povu no iha mós oportunidade divertimentu no mós haree informasaun sira ne’ebé Governu fó ona”, dehan atuál Ministru Reforma Lejizlativa no Asuntu Parlamentár (MRLAP) ne’e.
Programa Naroman ba Suku nu’udar programa pilotu ida hosi Governu Konstitusionál Daualuk liuhosi Sekretáriu Estadu Komunikasaun Sosial (SEKOMS) ho objetivu haat mak hanesan promove asesu ba informasaun iha suku rurál no hakbiit komunidade sira-nia kapasidade asesu ba informasaun.
Nune’e mós informa ba komunidade kona-ba Governu nian preokupasaun kona-ba dezenvolvimentu no tranzmite ba ministériu relevante.
Hasa’e komunidade sira-nia koñesimentu kona-ba dalan no prosesu halo planu dezenvolvimentu, inklui iha nivel suku, no prosesu implementasaun planu dezenvolvimentu no dalan ba povu nia partisipasaun no kontrolu.
Aléinde ne’e hasa’e no haluan povu nia partisipasaun ativa iha dezenvolvimentu nia prosesu tomak, no goza di’ak dezenvolvimentu nia benefísiu sira.
Relasiona ba objetivu sira ne’e maka ohin (18/10/20219), Governu ofisialmente halo lansamentu ba programa pilotu ne’e iha suku Batumanu, postu administrativu Atsabe, Munisípiu Ermera.
Partisipa iha lansamentu Programa Naroman ba Suku ne’e hosi MKAE interinu, Fidelis Manuel Leite Magalhães, Sekretáriu Estadu Komunikasaun Sosiál (SEKOMS), Merício Juvinal dos Reis Akara, Sekretáriu Estadu Kooperativa, Arsénio da Silva Pereira, Sekretáriu Estadu Terras no Propriedade, Mário Soares, Membru Parlamentu Nasionál, Prezidente Konsellu Imprensa, ekipa hosi Metro TV-Repúblika Indonézia nian, autoridade munisipál no lokál Muniisípiu Ermera no populasaun no reprezentante suku iha Atsabe mak Lasaun, Laubanu Atara, no Obolu.
Notísia relevante : Tempu Udan, Populasaun Batumanu Difisil Asesu ba Estrada
Jornalista : Antónia Gusmão
Editora : Maria Auxiliadora
